ھەڵیزە و کونە

ھەڵیزە و کونە

ھەراڵ "بوەو ھەراڵی مڎۊ"

جاران وەختو وەشکەردەیو دروسکەردەی ھەڵیزۍ و کونەی بوێ فرە پیسەوگولەو تننە ئامێنە لووتە،یانی ھەرکەسێ بوەکێش کەردێبۊ یەکسەر لووتەش گرتێنەو دوورکەوتەنۆ، ئەپی بوە ناۋەشی واتەنشا  بوەو  ھەراڵی، یام  ھەرچێوێ  بوەش پیسەو گولەبیێبۊ واتەنشا بوەو ھەراڵێ مڎۆ.

 جە پۆسو مەیێ ھەڵیزە  و جە پۆسو بزێ یام سابرینی کونەو ئاوێشا وەش کەردەن، دماو ئانەی ئاژەلەکەی سەرە بڕا،مەشۆ پۆسەکەیش ماڵیرە، پەی ئانەی ئاسان ماڵیۆرە مەشۆ فووش دەی،یانی فوو کەری چێرو پۆسەکەیش تا گردو لاشەکەی ماسۆ ،ئی فووە یاردەی جیا بیەیۆ پۆسی مدۆ جەگۆشتەکەی،وەلێم ئیسا پۆسو ئاژەلێ ھۊردڕا، دەردەو ھەڵیزو کونەی مەوەرۆ.

پۆسو مەیەکێ مارا و  چنی ھاردو مەکی ودۊی قاتی و تەڕ کەرا،  وزاش دلۍ گۊشڵێ و سەرش پۆژنارە، یەرێ ڕوێ سەرو یۊی ھاردو مەکەکەی فاڕی، ئیتر مووەکا ماڵیرە و گۊشتە گەناکەیچ لابەری، واوەی ھاردو مەکش شانی ھەتا ماوەو دەڕوا یام کەمتەر ، پۆسەکە پننر بۆوە ، ھەمدیس وزاشۆ دلێ گۆشڵەکۍ، جەوتو ھەنار تۆکڵی وردش شانا پۆرە ھەتا زەریف وەش بۊ،  جە ماوەو وەش کەردەیشنە بوێ پیسەش ھەنە،  پنەش ماچا " ھەراڵ"  بوەو ھەراڵی.

وەختی پۆسەکە بوەش کەمە بۆوە بەریش لاو ژەنێ ھەکە شارەزانە جە وراستەی ،ھەنگڵەکا بە زەریفی وازۆوە و پۆسەکەی قەمچنۆوە ھەتا ئاوی یام دۆ نە تاجنۊ.

جەوت و ھەنار تۆکڵ بە جیا دلێ دۆڵێنە خاس کویی تا زەریف وردێ با، دمایی قاتیشا کەری، ھەنار تۆکڵەکە فرەتەر بۆنە جە جەوتەکەی، زەریف شانیش ھەڵیزەکێ ھەتا  پننرە بۆوە و ئینجا گەنمێش کەرینە ھەتا دەق گێرۆ دماجار  کێشیش دار سەرو دوکەڵیوە یاگێنە ھەکە نانو چاشت کەری بە ئایرو داری دوکەلەکەش ملۆپۆنە  و تامش وەش بۆ ئیتر بەکارش ماری پەی ھەڵیز ژەنای یام ھۆرگرتەو دۆی.

وەلێم پۊسو بزەکێ یام سابرینەکەی دماو ئانەی مەکو ھاردما شاناو جەوتو ھەنراتۆکڵش کریا وەش بی و پننر بیوە،بەراش ھانە گر ڕوێ ئاویش کەرانە چنی ھەنار تۆکڵو جەوتی ھەتا بوەش پیسەکێش لامشۆ ، دامتەریچ ئاویش بەجیا کەرانە تا چن ڕوێ، وردەوردە سیاو بۆوە تامش وەش بۆ پەی ئاو ھۆرگرتەی.

ۋیرم مێ جاران یانەو بابایم  جارو بار بوێ پیسە ئێ دلۍ ھۆدێوەنە، ئازا لووتە گێرێنۍ و دوورێ گنێنمێوە، واچێنێ ماما ئا بوە پیسی چێشەنە، واچێ  ئانە پۆسا وستەنمانە ھاردو مەک و جەوتو ھەنارتۆکڵما کەردەنە تا ھەڵیزەش چنە وەش کەرمی.

جە پۆسو بزەکێ کونە و  دروسکەرا،پەی ئاوێ و  پەی خیگەو ڕوەنی بەکار مێ، وەلێ پۆسو مەیێ پەی ھەڵیزۍ وەرە ھەڵیزی.

ئی ھەرمانێ ماوەو مانگێ درێژە کێشۆ ھەتا بەتەمامی ھەڵیزەکێ و کونەکە حازرۍ بانە پەی وەرو دەسی و بەکار ئاردەی.

ئیسا یەخچاڵ  یاگێ کونەیش گرتێنەو، ھەڵیزەی فافۆنە وێپا خولیۆوە وێش دۆکەی ژەنۆ  یاگێ ھەڵیزو سێپایش گرتەنەو.

 د.ناجح گوڵپی   /ھەورامان ،ھەشتو گەلاوێژی /30/72017

کونە ...هەڵیزە.  پننر..تاجنای، خیگە،هەراڵ