مەسەلیٛ هەورامییٛ ....بزە

مەسەلیٛ هەورامییٛ ....بزە

1.      بڎیە بزیٛرەو دوٙش وازە : بزەی عالە شوٙتو ماس و دوٙی فرەو لەزەتیش هەن ، مەبەست ئانەن وەختیٛ ژەنیت ئاردە بڎیە ئەڎاو کناچەکیٛ بزانە چەنینەنە ئاوەختی لوە هیجبیش .

2.      بزە پەی شەوێ یاگیٛ ویٛش پاکە کەروٙوە : مەبەست جە پاکو تەمیزین بەشەر ئەشوٙ تەمیزو پوختە بوٙ  ، یانەو بەروبانش پاکو پوختە، ویٛش پاکو پوختەو دوخت زەریف بوٙ .

3.      هەر گوڵێ جوانا بزە وەروٙش: گردما مزانمیٛ دایمەو دەرهەم بزە گیٛڵوٙ کەشیٛنەو ملوٙ سەرگوڵ،سەرتەڵو گەڵا ناسکەکا موەروٙ ، مەبەست چا  ژەنو کناچەینە هەکە زەریفیٛنیٛو وەلێ  بەختو شەمسشا  زەڕەتاڵا ،یانی شوەکەشا زەڕەتاڵا،ناشیرینا.

4.      بزە شەقیٛش وریێنیٛ لویٛ نانو شوانەی وەریٛ: کەسێ خیانەت بە یانەوەیەکەیوٙ کەروٙ شەقێ مووەروٙ ،تیٛڵا تڕن کریوٙ ، یام کەسێ شەقیٛش وریا  ملوٙ زەرەرێ مڎوٙ تا  تیٛرشەقش کەرا، یام کەسێ بەدەسو ویٛش دەردو بەڵا باروٙ ملو ویٛشەرە.

5.      بزێ گەڕە ، گەلێوە گەڕ کەروٙ: ئینسانێ خراپ تایفێوە ،خانەوادێوە نامە زڕیاو خراپ کەروٙ، چەنی ئانەیچ مەشوٙ زانیاریما بۆنە هەکە نەوەشی گەڕی نەوەشیێ پۆسین توشو بزیٛ و فرەو ئاژەڵەکا مێ، ئەگەر بزێوە گەڕە بوٙنە ئانە گردو بزەگەلەکیٛ توشو گەڕی بانە ، چون نەوەوشیەکە بە ئاسانی  بەتیٛکەڵ بیەو لکای یۆیرە فاڕیوٙوە پەی بزە ساقەکا و ئاژەڵەکەی تەری.

6.      بزە قوتە جەمن ویەردە خوای کەردە سەرەش نیا ئاتەشگاوە:  یانی چیٛوێ هەکە دەسو منەنە بەرشی و لاو منۆ نەمەن ،ئتر هەرچیس سەرمیٛ پەیوەندیش نیا منۆ، خەیاڵم ڕەحەتا.

7.      بزە قوتیٛ جە دوٙ و بەرا وستیمیٛ !!: بزیوەما هەنە خەلکیچ ئەجۆشا ماسو دوٙش هەن ، یانی بیێنە بایسو ئانەی خەلکیچ یاردەیما نەدوٙ و کاسە هامسایما نەکەرا، یانی وەختێنە ویٛت چیٛوێت بۆنەو  دەردەیچ نەوەروٙ وەلێ خەڵک ئەرەجیوٙشا چیٛوەکەت دەردواردەن ،وەروئانەی یاردەیت نمەڎا.

8.      بزەما نەدییٛنە،بزە ڕێما دیێنیٛ: بزەما نەڎییٛنە، پشقەڵیما دیێنیٛ ، یانی فرە ناکەمێ جە دنیای زانمیٛ ئانەیچ  بیٛ هاگا نیەنمیٛ، گەلەما نەدیەن گەلەڕێما دییٛنیٛ .

9.      بزە لاو مەییٛنە نیشوٙرە ماچوٙ منیچ دەڵوەتەنا: یانی کەسێ  خراپ ویش لکنوٙ کەسانێ خاسیەرە ئەجۆش پاسە گەورە بۆو بە خاس ئەژمار کریوٙ .

10.  بزە دایم زەهیٛش ئینا بەرۆ، یەکجار هنەو مەیەکیٛ بەرکەوتە ،کەردش بەهەرا: بزە دایم زەهیٛش ئینا بەرۆ و قلیچکەش  بەرزا، وەلێ مەی ساڵینە یەکجار زەهیٛش بەرگنوٙ ئادیچ وەختو بەران گیٛرتەینە ، بزە کەرۆش بە هەرا ماچوٙ ئەها  زەهیٛش بەرکەوتە ، مەبست ئانەن  ویٛت کەسێ عەیبدار بی هیچ عەیبێ ویٛت نەوینی و هنو خەڵکی  ئەگەر ساڵانو مانگان یەکجاریچ بەرگنۆ  کەریش بە هەراو دەنگو باسیٛ .

11.  خوا هەقەو بزیٛ کوٙڵیٛ نمازوٙ سەرو بزیٛ شاخداریٛوە :  یانی کەسیٛ فەقیرو مەزڵوم ،ڕویٛ میٛ وەرۆ هەقەو ویٛش مسانوٙ ،دنیا هەر یەک بارە نیەنە ، زاڵم زەواڵش پەی یاووٙ ، دایم بزەی شاخدارە  بزە کوٙڵیٛ کوشوٙ .

12.  ئننەو بزیٛ سیاونا: لاو ویٛما  بزە ئاژەڵی سیاونا  و هاروهاجو بەڎ ڕەفتارەنە ،وەلێ مەی  "میٛشنە" نە و  فەقیرەو  خاسەنە و ئەزیەتو  یانەوەی مەڎوٙ، یانی کەسیٛ بەدڕەفتارو خراپە کار و ئەزیەتو ئازارو بەروهامسایو نیشتگای بڎوٙ .

13.  کەس حەسابو بزێت پەی مەکەروٙ: وەختی کەسێ تاریفیٛ ویٛش کەرۆ واچوٙ من پێسەو پاسەناو دەسم ملوٙ.. وەلیٛ  رەفیٛقەکیٛش کەراوە جواب ماچا پاسە نیا""کەس حسابو بزێت پەی مەرۆ" یانی ئاننە قیمەتش نیا دلیٛ خەڵکینە .

د.ناجح گوڵپی 3/10/2017  هەورامان