ساڵیادو کیمیاوارانو سەردەشتی
سی سالۍ چێوەڵتەر ڕۆ حەوتو پوشپەڕی (28/6/1987)
ی شارو سەردەشتی بۆموارانی کیمیایی کریا جە لاو
باڵەفڕە جەنگیەکا ڕژێموفۆتیاو سەدامیوە، بۆموارانو شارە مەدەنیەکا بە پاو
یاساو جەنگی قەڎەغەن و گەرشیلکەردەی گرد یاساو ڕاسا و پەیماننامە جەھانیەکان کە
بەرقەرار کریێنی پەی پاریزنای خەڵکی مەدەنی و لاشەڕی.
وەلێم جە دریژەو جەنگو ئیرانو ئیراقینە ھەردووی
دەولەتی ئی پەیماننامەشا وست چیرو پایاشاو خەڵکی مەدەنیشا بۆمواران کەرد، شۆنەو
ئانەیرە ڕژیم و سەدامی چەکی قەڎەغەکریاش بەکار ئاورد، چەکی کۆکوژ،چەکی کیمیایی،دژو
خەڵکی بێ دەرەتانیو مەدەنی، یانی دووەجار ئی بۆموارەنە تاوانەنە.
کۆکوشتەی خەڵکی بێ دیفاعی تاوانەو
جەنگینە،تاوانەو دژو مرۆڤایەتینە،تاوانەو ژینۆسایدینە(نسل کوشی) یام وەچە کوشینە،مەشۆ
تاوانبارەکێ جە دادگای تایبەتو ژینۆسایدینە دادگایی کریاو جەزاو وێشا ھۆر گېرا .
داخەم مەشۆ ھەڵای تاوانەو کیمیاوارانو شارو
سەردەشتی ،پێسە پنەوازی نەلێنە وەرۆ، ھەڵای زەخمینەکێ ئی تاوانێ بەدەردە وێشاوە
تلیاوە، خزمەتی تەمام نەکریێنی، تاوانەکی
سەرو حاسو ناوچەکەی و جەھانی نەشناسێێنە، دەوڵەتو ئیرانی تەقەلاش نەدا ،ھیچ نا
دادگاو تاوانەکا بەغداینە کیمیاواران و سەردەشتی بە تاوانەو ژینۆسایدی بشناسیو،
قەرەبوو زەرەرکاش جە دەولەتو عیراقی ھۆر
گێرۆوە و تا بۆ بە ئامیان پەی ئەژناسایش
سەرو حاسو جەھانی، ئینەیچ تەنیا بەنونگەو
ئانەی سەردەشت شاریوە کورد نشینا، ئەگەر ھەرمانەکیش بلا وەرۆ ، کورد زیاتەر
مشناسیۊ و پێسەو میلەتێ زوڵم وەنەکریای، یانی سودش بۆنە پەی دماڕۆ کوردی.
نەتەوەی کوردی جە ویەردەنە چننەھا جار جینۆساید کریان لاو دەولەت
داگیرکەرەکاوە، تائیسەیچ سەرەمڕە تاوانەکی واخوا باوە جە بەشەکا تەرو
کوردەسانینە،شةرناخ و جزیرەو کۆبانی و شەنگال مشتێن جە خەرمانو تاوانەکا دەرھەق بە کوردی،
مەشۆئانەیچ واچمی فرەو جارا کورد وێش بەکار ئامان جە بەشداری جینۆساید
و براو کەسوکارەکەیشەنە،ئینەیچ پیلانەو داگیرکەرانە پەی سەرنوگم کەردەی و شارتەیۆ
تاوانەکا، وەلێ مەشۆ چیولای ئاوەزما بۆ چەمۍ کەرمێ و وریا بیمی نەگنمی تەڵەوە و
نەبیمی دار دەسوداگیرکەرا پەی سازدای تاوانکاری.
ئیمەی ئینسان دۆس مەشۆ سالانە یادو دلێنە شیەی ئی ئازیزا کەرمێ
کە بەچەکی کۆکوشی کیمیایی دلێنە شییۍ
سەردەشتەنەو دەگاو شارەکا تەرو
کوردەسانینە، ھەوڵو تەقەلا و بەرنامەسازی
کەرمێ کە جارێو تەرو بارێ تەر ئی جۆرە تاوانی دژو مرۆڤایەتی واخوێ نەباوە.
یادکەردەی ویەردەیما یانی زیننە بیەیما،ژیوایما
بەئۆمیدو دماڕوێ ڕۆشنی.
سلام پەی شەھیدا کیمیاوارانو سەردەشتی
نەفرەت ئەو جەنگو تاوانکاری ،بژیۋۆ برایەتی و
ئاشتی گردو میلەتا
د.ناجح
گوڵپی
ھەورامان
28/6/2017
