هانەو پیرشالیاری

هانەو پیرشالیاری

دلێراسەو دەگاو گوڵپی هانێوەبێ پنەش واچێنمێ هانەو پیرشالیاری، ئی هانە دلێ چاڵێ گەورێنە بێ و بەدیوار دەورش گیریا بێ و بە پلیکانی وەزینیرە دلێش ڕەنگا دەمەترێ زیاتەر بیەبؤ،من وێم چندەها جارێ لوانا دلێش و ئاویم واردینە، وێەردەو ئی هانەیە  فرە کۆن بێ،  وەهارێنە  ئاوەکیش تەقێ و چنی ئاوەکاتەری لوێ یاگێ تەرۆ زیێوە  چاگەیچ هەر پنەش واچینمێ هانەو پیرشالیاری، یانەو ئۆساقادری گنێ سەرو چەمەو  وەهارە ئاو و هانەکەی، چاوە پڕێرە بەرەو ئاساوی و لوێ پەی وەرو دەگێ و پەخشانە بێ دلێ زەمینەکا وەردەگایرە، هامنێ کەمە بێوە دماتەر وشکە بێ، وەلێ چەمە ئەسڵیەکەش دلێ هۆشەو مەکتەبی هەر مەنێو وشک نەبێ،هەرکسێ گوڵپی کە جا مەکتەبەنە وانابۆش ،بەدڵنیایۆ  چا ئاویشە نۆش کەردێنە.

گێڵناوە  خەڵکو دەگێ پەی هەڵیز ژەنتەی و ساوەر گرینای و دانەدۆ گرتەیۆ فرەو  هەرمانەکاتەریشا  چی ئاوێ سودشا ورگرتەن  چون بە تەبەڕکشا زانان  واتەنشا پیت و بەرکەت گنۆ دلێ دۆکەیما،ساوەرەکەیما دانەدوەکیما، ئینە  ئانەی مدۆ بەر کە  خەڵك و ئادەگێ هەورامانیە  تا ئاوەختەو دماتەریچ کاریگەری ئاینو کۆن و  ناوچەکەی  (ئاینو زەردەشتی)  دلێشانە  مەنەبیەن،سەربارو باوەڕیشا بە ئاین و ئیسلامی.

وەڵێ ئانەی  مەکتەب کریوە پەی گوڵپی سەرو ئی هانەێۆ سورە چنارێ زەریف و بالابەرز لوابێ ئاسمانەرە نەتاوێنی تەماشەش کەری، کڵاوە گنێرە سەرتۆ ئەگەر دینێ پەی قەلاپۆپەیش، دیمەنێ زەریفتەرش دابێ دەگاو گوڵپی دورۆ پێویێ،هەر بۆنەو  ئی سورە  چناریوە  گەڕەکێوە گوڵپی نامیش "گەرەکەو چناری "بێ، دماو کەردەیۆ مەکتەبی جەدەگاو گوڵپی  ساڵەو (1932-1933) هانەو پیرشالیاری کەوت دلێ هۆشەو مەکتەبی و ئیتر پەی ئاو  واردەو مەکتەبی بەکار ئێ و خەڵک  کەمتەرئێ ئاویش چنە بەرێ  مەگەرپەی تەبەڕکی ئاما بیێنێ.

داخەم مەشۆ دماو بارکەردەی دەگا وگوڵپی  و ساڵەو (18/9/1978)  پیسەو هانەکا تەرو دەگێ و گرد و باخو مڵکەکا جیا مەن،  ناوچەکەما  بی بە(  قەدەغە) کەس نەیارێ بلوە  پەی دەگێ ،وێما خورماڵ بینمی ئۆردوگای زۆرەملێنە، هانەو پیرشالیاری  هەتا  ساڵەو  1988 ی مەنەبی ،وەلێ دمای جەنگو داگیرکەردەی هەڵەبجەیو و ناوچەکەی ، بە نونگەو دای وەنەو  جادەیۆ  جەلایەنو   هەردوی تەرفا جەنگیۆ  هانەو پیرشالیاری پەڕ کریاوە و  کۆر بیۆ کەوت وەرو جادەیۆ ، تامانگەو  6/1988 ی  چنارەکەیچ مەنەبی، چوون جاریوەشا چۆدیمۆ  ئامانێ پەی هەلەبجەی  جە خەرپانیوە دیم، ئیتر نمەزانو ئایا چنی دای وەنەی جادەکەی هەم هانەکەو هەم چنارەکە  دلێنە شیێ یام بە جیا وەڵتەر هانەکە  کۆر کریانۆ  و دمایی  چنارە گەورەکەشا  بڕیەبۆوە بەی تەماعی سودشا چنە وەرگرتەبۆ  چون فرە گەورەبێ ،ڕەنگا  چن تەنێ تەختەش چنە ئامابۆوە.

د.ناجح گوڵپی

19/6/2017