جەم بیەو گروپوهەورامانی

بەشدارا  جەم بیەی

سڵامتا وەنە بوٙ خیٛربەیدیٛ سەروچەما

دماو ئانەی گروپو هەورامانی  موٙڵەتو ڕاپەرسی ئی فۆرمەیشە هورگرت ، چن پەرسێوەش وستیٛنیٛ ڕوە دەربارەو ئەوە ژیوای هەورامانی ، گەرەکمانە جە ڕاو جوابو ئی پەرساوە یاوینکێوەما دەس گنوٙ و گراڵێوەما بێدەس  تا وەرەچەماما ڕوٙشن کەروٙ وە بزانمیٛ چەنی هەنگامە بنیەیمیٛ  .

هەورامان یانەوەی فەرهەنگێوە دوٙڵەمەندین جە گردو ویەرەکانە ، دماو بارکەردەو زوٙرەزمیٛ  ساڵەو 1978  بە دەسو ڕژیٛمو بەعسی گوٙڕبەگوٙڕی ،  یاگیٛ ویٛشەنە هورکنیا  لەتمێ  ئابوری و فەرهەنگی کوٙماڵەیش پەنە یاوا،دماتەریچ جەنگو ئیٛراق وئیٛرانی ئاننەی تەر کوٙڵەوار کەرد، هەورامیەکیٛ  ئوردوگا زورەزمەکایچەنە نەمەنیٛ، پژگییٛ گردو شارەکاو کوردەسانیرە.

چۆڵبیەو هەورامانی و نەمەنەی نیشتگای لەتمێ کوشندەش دا هەورامیەکا ، پژگیای و تیٛکەڵی هەورامیەکا شارەکانە کاریگەریێ خراپش نیارە سەورو کاڵ بیەو فەرهەنگو زوانەکەیماوە ، جەنگو جەڵەبەوی کوردەسانی ئاننەی تەر ئاژەکەش ئالۆزتەر کەرد، چاوەختۆن حکومەتو هەرێمی ئامان سەرو دەسەڵاتی  بە هورکارو  نەبیەی گراڵێوە هێقمی پەی ئاوەدانکەردەی گردو دەگا وێرانەکا  کوردەسانی ، هەورامان ئاننەی تەر دەردەش بیٛدەرمانە بیە .

ئێمە چیٛگەنە ،واخواو کوٙشای هەورامیەکا باس نمەکرمێوە هەکە ساڵانە سەردای گردو دەزگا تایبەکاشا کەردەن و داواشاکەردەن پەی وانای  بەزوانی ئەڎایی جە وانگاکا هەورامانینە و چندەها داواکاریێ تەریچ.

وەروئانەی و چندەها نونگا تەریٛ ، هەورامیەکیٛ مەشوٙ  قوٙڵیٛ هورماڵاو چێولای فەرهەنگو زوانو کسمو ژیوگەو هەورامانی پاریٛزنا، چون زوانو فەرهەنگ هەویە "کیٛبیەو" ئیمەن،  هەر چیٛگەیچەنە دوا کەرمیٛ گرد لایێ هامکارێ با پەی سەر وستەی ئی لاقوٙریٛ هەکە ڕوٙڵەکا هەورامانی  نیێنە پەی ئەوەژیونای فەرهەنگو هەورامانی ، پی بوٙنەوە چن ڕوێ دماتەر سەردای "تەویٛڵیٛ ،بیاریٛ،خورماڵی " کەرمیٛ پەی پەڕکەردەیەو فوٙرمەکا و قسەو باسی زیاتەری چەنی خەڵکەکەیما کەرمیٛ .

   گروپو هەورامانی 11/11/2017