سەیڎ قڕان

فرە نا کەم  گردما ڕازەو سەید قڕانیما ژنیێنە ، گیٛڵناوە ماچا زەمانو دەسەڵاتو هارونە ڕەشیدی خەلیفەو عەباسیەکا  ، گەشتو گیٛڵێوە شەوانیٛنە  ویٛش فاڕوٙ و جلو بەرگی سادە کەروٙنە  و ملۆنە بازاڕو  بەغڎای پایتەختی سەرنجەو حاڵو خەڵکی و بازاڕی مڎوٙ  ، مڎیو پیێوە  چڵکنو فەقیر خەریکو  واردەی گوٙشتو هەری توٙپاین، خەلیفە سەرزەنشتو کابرای کەروٙ ماچوٙش پەنە چەنی گوٙشتو هەری توپای وەری، مەزانی حەراما ،کابرایچ جواب مڎوٙوە ماچوٙ " واردەی گرد گوٙشتێوە پەی کەسێوی ئاواری حەراڵا"، ئتر خەلیفە مدروٙ هیچش چەنی مەواچوٙ، وەلێ تەسبیٛحێوە زەریفیٛو قیمەتییٛ خاسیٛش بانە  مڎوٙشا پیا ئاوراکەی ماچوٙ لوە ئی تەسبیٛحا ورەشەو واردەی حەراڵشا پەنە بسانە .

کابرای فەقیرو ئاورا تەسبیٛحەکا بەروٙ لاو زەرنگەرێوە جولەکەی ، تەڵا سانی جولەکە هەکە تەسبیٛحە گران قیمەتەکا وینوٙ دەسو پیا نەدارەکەیوە .یەکسەر خەیاڵو گیٛچەڵێ و تەڵەکەبازی مێ مەژگش ،ماچوٙ ئی تەسبیٛحیٛتە چکوٙ بییٛ ،ئانە هنیٛ منەنیٛ و ماوێ چێوەڵتەر یانەکەمەنە دزیێنیٛ .

جولەکەکە ملوٙ پەی لاو قازی شکات کەروٙ ، پەی سەلەمنای شکاتەکەیش دوویٛ شاهیدیٛ بەروٙ چەنی ویٛش،ئادیچیٛ جولەکیٛ با و دوویٛ میٛزەریٛ سەوزێ بەسوٙ سەرەو شاهیدەکارەو گوایا ئینیٛ سەیڎیٛنیٛ ، داداگایی فەقیرەی کەراو شاهیدەکیٛ شاهیدیێ دروٙزنانە مدا پەی زەرەنگەرەکەی و قازی باوڕشا پەنە کەروٙ ، ئتر قازی فەرمان مڎوٙ هەکە دەسو کابرای ئاورای بڕاوە.

دماو ماوێ  هەمدیسان هارونەڕەشید گەڕێ تەرو گیٛڵای و چەمداری دەس پەنە کەروٙ پەی بازاڕی، مڎیو  هەمدیسان کابرای ئاوراو فەقیر ئینا بازاڕەنە و سواڵە کەروٙ ،ئاما وەردەمو خەلیفەی و داواو کۆمەکو هامکاریش کەرد، خەلیفەیچ  ئەشناساوە واتش توٙ کابرێوە فرە دەسوەڵاو چەپڵاو کەرەنی  ئا تەسبیٛحیٛ دایم پەنە بەشو چن ساڵێوە ژیوایت کەریٛنیٛ  ، چەنی ئیسا هەم سواڵە کەری؟.

وەلێ کابرای دەس بڕیاو فەقیر حاڵو مەسەلەو سەرئاماو ویٛش پەی گیٛڵناوە!!!  خەلیەفە هەکە ئینەش ژنی فرە توڕە بی  ،لوا  زەڕنگەرو هەردووی شاهیڎەکیٛش چڕیێو  کوشتێش ، بیٛ ئانەی جە فیٛڵەو جولەکەکەی تاقیٛق کەروٙ فەرمانش دا هەرچی سەید هەن و هەرکەس میٛزەرەی سەوزش ئینا سەرۆ گیٛردیٛشو کوشدیٛش.

ئتر دماو ئی کارەساتیە سەربەرکەران بیەن،هەرکس یاوان پۆرە بەغدانە و چیٛرو دەسەڵاتو حوکمو هارونە رەشیدینە  بەرشیێنێ و  ڕوەشا کەردیٛنە کەشاکا کوردسانی و هەورامانی، چاوەختۆن  سەیدێ جە کوردەسان و هەورامانو ناوچەکا تەرینە پەیدا بیێ ،وەرو گیانو وێشا چیٛرو دەسەڵاتو دەوڵەتو عەباسینە نەمەنیٛ ئەگەر مەنیٛبایچ بە دزیوە وێشا پەنا دان .

ئەوەگیٛڵنای : د.ناجح گوڵپی   5/11/2017 هەورامان

هارونە ڕەشید پەنجەم خەلیفەو دەوڵەتو عەباسی بیەن  ساڵەو "786 -809 "زاینی  دەسەلات بەدەس بیەن ،خەلیفیوە   نامی بیەن