وەڵێنە
حەز کەرو دیمەنێ جە ژیوا و دەگێکیما وزو وەرەچەماتا
جە ویرەوەری منەنە زەماوندێ فرێم دینێ جەگوڵپەنە،
ئاوەختە من زارۆلە بێنی ، ویرما فرە وزەماوندەکا و ژەن ئاردەی گنێ پایزو زمسان،
چون پایز و زمسان و هەورامانی سەخت بێ و
وەروە و وارانی فرە وارێ دەرتان وهیچ هەرمانێ نەبێ کە وەختت وەنە گیرۆ،ئیتر
زەماوننە کەرێنێ، خەڵک وەهارو هامن ڕەنج
دێ و پایزو و زمسانێ نیشێرە وەریش، هەرمان و ڕەنج و ئاوەختیە کشتوکیار بێ پێسە ( گەنم و یەوێ،نوەی میژوویی، ماشەسیاوە
ماشە چەرمە، تەماکۆ،بامیەو بایجان،ڕۆجیار پرس، کەتان، کونجەی،بویسان و کاڵەک و
ترۆزی دەیم، خەیاری وەراو،شەمامە......هەتا دمایی).
زەمین کاڵای ئەوسا بە ئاژەڵ (گاویت ،هەر و هەسەر ) بیەن،دوێ گاوێ خاسێ
گاوەسن و یەرەقشا بۆ بەسێنێ و هیتیارێ
زەمینەکەی کاڵی ،یەواش یەواش، هیتە و ئەوسای ئانەش خاسبێ سەربار و زەمینە تەختەکا،
تاوێ پۆ کەشەکاوە زەمین کاڵۆ لاتەموو و
نسارەکاوە،دلێ باخ و میوەدەیم ،هەتا گەنم
و یەو، میژوێی لانسارەکاوە کەرێنێ .
هەرپاسە ئاژەڵداری کسمێ تەرو خەڵکی بێ ( مەی ،بزە،بزەی مەرەزە،
گاو) وەی کەرێ و پەنەش ژیوێ،ماسو دۆ
،پەنیرە ،کەشکی ، بەرهەم ئارێ بەش و ژیوای
وێش و زیادەکەیش ورەشێ یان بەش و بەرو هامسای دێ.
بازێ
خەڵکیچ وەلاخی بەرزە شا بێ( هەسەرە،ئەسپ، هەر) پەی بار ئاردەیو بەردەی جە دەگاوە
پەی شارەکا یان دەگاکا سەر سنوری ، پێ جۆرە ژیان وێش گوزەرنێ.
هەرپاسە ویرما نەشۆ هەورامان بەناو بانگا بە
باخو میوەدەیم و جۆرەها میوەی لەزەتی، ژیوای فرەو خەڵکو هەورامانیش سەربێ (وەزی،وامی
هەشتاڵوی، شێلانێ ،هەڵوچێ،هەنجیر ،هەنگوری،هەناری ، بلچی،تایلێ،وەنی
،براڵوی،سنجەی، گیلاس،مروێ،ساوی،بەی ،تفی ......)
ئیسا پەیما بەرکەوت هەورامان تاوانش
پێوستیەکا ژیانی جە واردەی پەی وێش دابین کەرۆ،هەرپاسە پاڵا و جلو بەرگی تایبەتو
هەوارامنی بیەن (کالش و چۆخو رانک، گۆروێ پوزەوانێ ،جاجم ،مەوجە ،لێف ...هتد ) .
هەرکەس گەرەکش بێێ کناچێ بارۆ پەی کوڕەکەیش ،دماو راماڵی و هۆرگێرتەی قسێ
دەمو ئەداو تاتەی و برا و کناچەکێ،چن پیێوە
ماقوڵ و قسەزانێ لوێنێ هیجبی (داواکاری)
ئەگەر هەرمانەکێ بەخێڕ سەرش
گرتێ دەس ماچ کرێی و ئامۆشۆ گنێرەو دماو ماوێ بە دڵو هەردوێ لایا کناچێ مارە بڕیی.
خەرج و ژەن ئاردەی ئەوسای فرە هەرزان بێ،
هەرچن ئا زەمانەیچە زەڕ فرە کەم بێ، دەسێ یان دودەسێ جلێ کەرێنێ پەی وەیوێ،چنی
بازێ ئاڵتونی ( گوارێ، ئەڵقەو ،گلکەوانە،سەعاتە چەنی یۆ چی چێوا "ملە
لیرە،پەڕەملێ، گۆبەرۆک " )، خۆ ئەگەر هەرکەسێ تواناش فرە تەرە بیبۆ ئاڵتونی
زیاتەرش کەردەن، پێسە بیبینی ئاڵتونی.
زوتەر کلاو زەڕە ،لاگیرە و چێر چەناکە و
پڕچکەی تلاین و لیرێ کریێنێ پەی وەیوێ.
جاران کوڕ ژەنی ئارێ چن سالێ چنی یانەو
تاتەیش نیشێرە،دێر یانە جیایی کەرێ، مەر کوڕی تەر ژەنیش ئاردێ ئینجا یانەش جیا بیێوە، کوڕی جامنەیچ بێ هەر یانەو
تاتەیش جیا نەبێوە.
ئەوسا ماوەو مارە بڕییە فرە بێ ، شش مانگێ زیاتەر بەرێ، جاری چامنە
بێ سالە وەخت ئێوە، ئەشیا زەما خزمەتو یانەو
هەسورەیش کەردێ ،نەخسوس یانەو
هەسورەی کورشا نەبیێ، زەما گرد هەرمانێ کەرێ پەی یانەو هەسوەریش پێسە ( بان تلنای،وەرو ماڵای، نۆرە گەلە، درەوە،کەرەمتو
کێشتەی، گەرە،سمەر ئاردەیۆ ،کەپر بەستەی.گۆل وردای،ئاوداری، هێزم ئاردەی،بازاڕ کەردەی،بارە
ئاساو هاڕای) ئیتر پاڵو ئی خزمەت و هەرمانانە بە پاو توانای دیاری و سەوقاتی بریان پەی یانەو وەیوێ پێسە (
گجی، کەوا،سەڵتە ،سەرپۆش، کەلە قەن،خورماوی......) .
وەختێ هەرمانو کار تەمامیێ و وەرزو پایزی ئێ
ئیتر یانەو زەمای لوێنێ پەی لاو یانەو کناچەکێ ،یان چن کەسێ ئەسپارێنێ پەی ئانەی
بلا داوا کەرا بائیتر کناجەکێ فاڕمێوە خۆ ئانە سالێش لوا ملەرە، دماو ڕێک کەوتەی و
دیاری کەردەی ڕۆ وەیو و زەماوندی، جلو بەرگی جوانو زەریف پەی وەیوێ هۆرگێرێنی و
بەرێنیش لاو خەیاتی و ورازیی و زەمایچ جلێ تازی ورازێ ویش قۆز کەرێ ،جاران خەیاتی
پیا کەریش تاوێ جلێ ژەن و پیای
ورازۆ، خەیاتەی ژەنی فرە کەمێ
بێنی،بەلام چی دمایۆ پەیدا بێی، ئەوسا بەرەحمەت بۆ (مەلاحسەین) جلێ پیایانێ و
ژەناننیچ ورازی.
هەفتی
یان زیاتەر وەڵی ژەن ئاردەینە ،رەفێق و برادەرو قەوم قیلەو زەمای، پەی
باربۆ و کۆمەکی لوێنێ پەی کەشی گەلە هێزمێ
کەرێنێ پەی یانەو زەمای،دە دوانزە بارێ هێزمێ ( بارو هەری یان هەسەرێ ) ئارێنێ تا
زەما زمسانێ سەردش نەبۆ و بە ئیسراحەت چن
مانگێ شیرینەش چەنی ژەنەکێش بەردێ سەر، ئەوسا ،گەلەهێزم، یان گەلەدرەو، فرەو
هەرمانەکاتەری لادەگانە بە گەلکاری و دەسەوام بیەن .
( دەسەوام) یانی من ئارۆ مەو یاردی تۆ مدەو هەرمانەت پەی
کەرو، سەوایچ تۆ مەی هەرمانەکێم پەی کەریوە بە دەسەوام.
چن ڕوێ
وەلێ فاڕایاۆ وەیوێنە، هەرزەکارێ دەگێ جە رەفێق و برادەری شەوێنە کۆبێنێ یانەو زەمای، جۆرەها گەمێ وەشێ کەرێنێ پەی سەرگەرمی و دڵ وەشی زەمای و وێشا، جاری
چامنە بێ تا مەللا بانگدای نەوتێنێ هەر خەریک و کەیفو وەشی بیێنێ، چن جۆرە گەمێ
(کێڵێ) کەرێنێ پێسە ( گۆرەوەبازی،یاری
تاقیلە، وشتر چەمچە، تەڵەو ڕواس.....) چەنی گێڵنایۆ جۆرەها رازو حیکایەت و بەیازێ هەورامانی
و کوردەواری و قسێ وەشێ و مەتەڵی واتەو وەڵێنا.
هەرپاسە
ڕۆنە چنی جۆرەها گەمی وەشێ کەرێنێ پێسە (
سێبازو،حیزەران و گۆتەکێ، کێلە ماڕانی، کۆتە کۆتە، تۆپقاڕ و قەرەخواجە ) چەنی
ئانەیچ زەماوندە گەرمە کەرێنێ، ورپڕای دوێ روێ وەلێ ئاردەی وەیوێنە نەمێنێ وەنە،
زەماونگاکە و دەگێنە، دماو ئارەدەی وەیوێ هەڵای خەڵک ودەگێ واز نارێنێ "پیرو
گەنج" ، دینەم هەفتی دماتەر هەر ور پڕێنی، زەمانو شۆڕشی زەماوننە زەوق شەوقی تەرش پەیدا
کەرد ئادیچ تەقە کەردەی و نیشانە ماڕێ و گرەو کەردەی بێ .
ڕوێ وەلێنە
پاوەیوە لوێ پەی یانەو وەیوێ، پاوەیوە قەومەو زەماینە جەلاو یانەو زەمایۆ کیاناش
پەی یانەو وەیوێ دوێ تا یەرێ ژەنی بانە ،ژەنی خاسەو قابیلەت دارێ،زەریفێ ،هەتا
تفاق و کەلو پەلو وەیووێ بەرۆنە ،وەیوە رازنۆوە و،چاشتی حازەرکەرۆ پەی یانەو
وەیوێ،چنی چن هەرمان و راسپاردێ تەری.
وەرەتاو
کەوتەی ورزێنێ و یانە و وەیوێ کۆکەرێنێ ،نانوچاشت حازرکەرێنێ و وەیوە رازیوە،جلی وەیوی
کەرێنە،و تارێوە سورە یان چەرمێ دێنێ سەرەشەرە، ئیتر وەلێ نیمەڕۆی (جاشتنگا) وەیوە
سوارە کەرێنێ،ئەوسا چن هەسەرێ رازنێنی مەوجێ ڕەنگاو ڕەنگ و بریسەک دارێ دێنێ مل و
هەسەرکارە و هەوسارەکەشا بەگوڵەنگی زەردو سور و هەمەڕەنگ رازنێنێوە ،وەیوە سوارو
هەسەرێ خاسێ کەرێنی،پاوەیوەیچ سوارو هەسەرێ تەرێ وگنێ وەلێ وەیوێ، چن هەسەرێ تەریچ
دماو وەیوە بێنێ ئادیچ هەر عایدو پاوەیوێ بێنێ ، ژەنەکێ زەریف ویشارازنانۆ،
قەتارەو هەسەرا گنا را یانەو وەیوێوە پەی یانەو زەمای، ئەگەر هەردوێ یانەکێ نزیکێ
بێنێ، پێچ ودەوریش پەنە دێنێ دلێ دەگێڕە تا زوو نەتەمامیێ، چنی ئانەی چن باڵا جامێ
گەوری سەرو سەرەو چن کناچە زەرئیفاوە بێ
ڕوە دما گێرینێش تا وەیوە رسمو وێش وینۆوە دلێ جامەکەینە ،خەلكێ فرە جە
کوڕو کناچە و ژەن هەرزەکارو پیر گرد چنی وەیوێ گنا را، چەنی قەتارەو وەیوێ دوێ گۆرانی واچێ دەس کەرێنێ بەگۆرانی واتەی، چن
جۆری گۆرانێێ تایبەتی بێنێ وەختو فارایاو وەیوێ،چەپڵە کوایی و قاو قیل کەردەو
زاڕۆڵا هەر مەپەرسە،چەنی بەزمو گۆرانیا تێکەڵ بێ ، هەتا وەیوە یاوێ مەنزڵ چن بەزمێ
گۆرانێێ واچێنێ و فاڕێنی،، ئا گۆرانیه
تایبەتێ وەختو وەیو ئاردەیەنە واچێنیشا (
هەی بادە بادە یارەبی مبارک بۆ بادە... شۆڕێ بالا بەرز.....بەتۆرت کرد
بەتۆریای،هۆگوڵە لەسەر چی تۆرای، لەکۆڵانی تەنگەبەر شان مەدە لەشانم .......هتد
)، وەختێ وەیوە یاوێ یانەو زەمای ، زەما
سەرو بانێ بەرزیوە یان بانجیلەکەیشاوە ساو
و پرەتەقاڵ و نوقڵی ترش شیرین و چکلیتێ و
زەڕی وردە هۆردێنێ ملو وەیویڕە،
ئیتر گرکەس سەرقاڵ بێ پەی ماشتەیۆ زەڕی و
نوقڵ و چکلیتی، و زەما ئێ دەسو وەیوێ گێرێ و بەرێش یانەرە، ئیتر چاو دمای نان و زەماوندێ کەرێنێرەو خەڵك
نان وەری، دمای ماوێ کوڵی یانەو زەمای جیا
ئازێنی لوێنێ پەی زەماونگای و ورپرای.
ورپراو ئەوسای خەڵکی بەتەمەن
پیاو ماقوڵ و مشکی بەسەری کەردەن، کەمتەر گەنج و سەر ڕووت ورپڕێنێ.
چەنی ڕیزو پیایا ،لایو تەرۆ ڕیزو ژەنایچ ورپڕێنێ، ویرم مێ
ورپرای ژەنانە جەگوڵپەنە ،شیوازێ تایبەتش بێ، هەر چەپین و نەرم تەرا مەیا وەرۆو
ملاوە دما،پەنەش واچنێ ورپرای ژەنانە و جیاوازبێ جە چەپی پیایا، کۆمەلێ ژەنی ئەوسا
سەرچۆپی گێڕێنێ پێسە ڕەحمەتیا ( مەتی تەلێ
ئەحمەد بەگی، بەیزاو حمە چەقی،فەرخیەو حمەلاوی ،شێرینە ولالۆ تەوفێق چەقەڵەی،زێباو
عارفی) ، جارێشا زەماونەو لالۆ عیزەت و حاجی حمەخانێ بێ. دێدە فەرخیە سەرچۆپی بێ و
چۆلاوەیچ توباو لالۆ ئۆلقادری ئاما نەما ورپرای گاوانیوە، سەرو هەرمانێوە گێڵێبێوە
بەجلێ هەرمانیوە،قۆڵێنەکەش نیارە نەما وەنە، هەرچی چڕێنێشۆ یانەنە ، بەدەمو ورپڕایۆ واچێ
مەنەنم ،مەنەنم، ئی دیمەنە جوانە مانێوە فرە قوڵە مدۆ،بزانە خەڵکو ئەوسای چن دڵ
وەش بیەن، گۆشش نەدان ،هەرمانو کارش جیا ئاستەن پەی کەیف و شادی.
زەماونە
فرە و جارا دوێ دەسێ بێنێ یانی دوێ ڕیزی، پەی بینە بەزنێ بێ و گەرمش کەرێنی، ئەوەڵ
جار هەتا گۆرانی واچ ئامێ کەم کەمێ ڕیزو هۆرپرای جوڵێوە، دەسور و هورپرای هەورامانی پاسە بێ وەلێنە
بەزم و یاران یارانی و چاوڕەشەکاڵی
یانی گۆرانی خاوی بێنێ تا لاشەو زەماون
کەرەکا گەرم بیێ، دماو سوڕێ یان زیاتەری
گورانیە خاوەکێ فاڕێ و کەمێ خێرا بێوە،
ئیتر بەزم و چەپڵاو هورپرای دەس پەنە کەرێ، ڕیزو هۆرپڕای فاریی بە بەزمو چەپی
شانە هورتەکنای و ورگ جولانای وقاوقیل
کەردەی ، هەر ڕیزێ جوڵەی جوان سەرچۆپی
خاسو قاوقیلی فرەش کەردەبێێ ئانە ڕیزکەی تەرش بەزنابێ و ،ناچار ڕیزەکەشا تێک شێ و
ئێنیوە پەی لاو ئیدیشا، ساحیب زەماوندیچ لوێ گاوانی دەس گێرێ تا ڕیزو ورپراکەی پاریزنۆ و زەماوننە تێکە
نەشۆ، زەمایچ ئارێنێ پەی ورپرای، هەرپاسە فرە و جارا ژەنو پیا پیوەرە هورپران
بەلام کەسوکارو یۆترینێ بینێ و مەحەرەمێ بینێ ،یانی ڕەش بەڵکە نەبیەن ،( ماچا شێخ
سادەقی ڕەحمەتی ناستەن ڕيش بەلەک بۆنە )،چن ڕوێ هورپرایو زەماوننە و گەمە شەو
بەردەام بیەن، ئیتر دماو ئانەی وەلاوەشا وەنە کەردەنو هەرکەس لوان لاو هەرمانەو
ویشۆ.
گوڵپ دلێراسەو
دەگێنە یاگێش بێ پەنەش واچێنێ زەماونگاکە، فرەو زەماوندەکا دەگێ و ورپرای پیایا
چاگەنە بێ، هەرپاسە چن یاگێ تەریچەنە تاوێنی ورپڕی ( کەماڵاوا، سەورۆگاکە وگەرەکە
و چناری، بانو بازاڕا،چێڕ گەڕەک)، ژەنیچ بان و چەیاخانەکەو زەماونگاکەینە یان وەرو بەرەو
یانە زەماینە ورپڕێنی.
وەختو
زەماوندێ دیمەنێ جوان بێ ئادێج کەردەی
سەرو بانەکا گوڵپی بێ ،ژەنو کناچەو کوڕوکاڵ گرد پا بەرزۆ تەماشەو زەماوندێ کەرێنێ
و وزەو تاقەتێ دێنێ بە زەماونەکێ،بەتایبەت ئەگەر کەسێ چیوێ دڵشەنە بیەبۆ و تەماشەشا
کەردەبۆ مانیایش پەی نەبیەن.
خەڵك و
گوڵپی و هەورامانی چن جۆرێ ورپرێنی ( یاران یاران ، چەپی،سێ پێی، خرنگە ) ،ورپڕای
گوڵپی یان هەوارمانی تایبەت بیەن، چەنی جوڵەو قاچا ،قاچ کوای زەمینەرە، جوڵەو شان
و ملی و دەسی ورگ سوڕدای بە شێوێ ڕێکو پێک
و گاڵەو هاوار کەردەی ،پتەوی ڕێزەکەی دیمەنێ زەریفش بەخشان بە ورپراکەی، بەپاو
بەزم و گۆرانیەکا، ورپراکەیچ فاڕیان.
زەماون چیەکێ گوڵپی :خەڵک ئەوسا تێڕ واردەیش نەبێ جە
ورپرایی و تەماشە کەردەی،جاری چامنە بیەن سەحبێ زوو هەتا وێڕەگا شەوە ئامێنە ورپڕێنێ،یانی تاوو واچو گرکەس ورپڕان و چێگەنە
مەکریۆ نامێ گردی وردەیمێ ،مەر پەی دەسو
دیم و تارەتی دەسشا وەردابۆ، زارؤلە بێنێ
دەسێم و قاچێم کرۆڵیێ بێنێ ،خەریک بێ ڕەق بوە نەلێنێوە پەی یانەی، هەر
تەماشەو ورپرای کەرێنی ، ئا کەسێ کە زەماوننەو گوڵپیشا گەرمە کەردێنە ویرەوەری منەنە و وەڵتەریچ کەژنیەنم ،گرد بەڕەحمەتێ
با و ئانێچ مەنێنێ عەمر درێژێ با ( لالۆ تۆفێق چەقەڵە، فەقی غەفور، لالۆ عەزیز علی
پەشە، مەلا حسێن،حاجی غەفور، حمەمین رەمەزان، حمەمین حمە شەریف، حاجی حەمە عارف،
حاجی ڕەحمان ،حاجی کاکە برا، لالۆ ئەحمەد ئاغە شڕ، لالۆ کەریم حمەڕەحیم ،فەرج
سەعید، ئەحمەد و نەسەی ، عوسمان و ئەحمەدو نەسەی ،مەحمودە سور،مسەفا حمەخان
،عەبدوڵا حەمەخان،حاجی وەکێڵ و حاجی حەبیب،لالۆ جافر، حمەمین و فەرەجی، تۆفیق حمە
رەحیم ،توفیق حمە چەرمەڵ ، ئەحمەد محمەدی بابام و گردو کوڕەکاش ورپڕێنێ،بەلام ئیسا
تەنیا من چا تایفەنە ورپڕو) ، ڕەحمەتی لالۆ حمەنەجیب وحاجی حمەخانی هەر فرە وەش
ورپڕێ ،من دایم سەرنجەش دێنێ ،هەرپاسە کۆمەلێ هەرزەکارێ بێنێ ئەوسا ورپڕێنێ وێم
دیێنێ و ئیسا خەریکا پیرێ بیێنێ کاک (
سڵێمان و حاجی فەتحولای،مەجیدو حاجی کاکەبرای، ڕەحمەتی غەفور تەوفیق، زایرو حاجی
مارفی، ڕەحمەتی ئەسکەندەر ئەحمەد ،ڕەحمەتی نەسرەدین ئەحمەد،ئیسایچ چن کەسێ هەنێ هەلای
حەزشا جە ورپرایا گولپەنە پێسە،عەباس حاجی
حەبیب، ئاوات نەسرەدین،ناجح گوڵپی، ڕزگار حمەمین،جەمال محمەد،چندەها گەنجێ تەرێ
،بەهیواو تەمەن دریژی پەی گردی).
وەشترین ورپڕای جەگوڵپەنە ورپرای خرنگەکە بیەن،گێڵناوە بەرەحمەتێ با حاجی ڕەحمان
سەرچۆپی ئی ورپرایشە گێرتەن، هەرپاسە لالۆ ئەحمەد و حاجی حەبیب، یەرێ جارێ بەرزێ بینیوە دانشاوە
زەمین، چەنی قاو قیلو گالەی، شانە دایۆ یۆی ،یانی جۆرە دەنگێ شا چؤوە ئامان (
هۆپ،ها...) گۆرانی واچەکێ گۆرانێ تایبەتە
و ئی ورۆپرایشا واتێنە بەنامێ هۆ خرنگەکە.
ئیسەیچ ئینا وەرەچەمامۆ
ڕەحمەتی حاجی حەبیب کە سەرچۆپی گێڕ و نەمێ سەما کەردەی بە گۆجانەکیش، یادما نەشۆ
مامۆ رەمەزان (کەپڵە ) ئادیچ ورپرێ، سەمای کەرێ، هەرپاسە گجار چەنی ورپراکەی تەنزیم و زەماونگاکەی کەرێ ،زاڕۆلەو چیو بەرێ
ئەولاوە تایەگەکێ فەریحتەرە بۆ، دیەنیچم جارێنە دە دوانزە فەرنجیی کەرێنە هنێ زەماون کەرەکا ،چون فەرنجی خاس نمازۆ شان
وملت بەرگنۆ و وێت ئەرمانی، مام رەمەزانی رەحمەتی
گردی کەرێ سەرو شانەیش.
زوڕناو دهۆڵ ژەنێ بیەن خەڵک و
کەیمنەی ،فرە زەماونەکا گوڵپینە بەشدار بیەن نامێش ڕەحمان بیەن، وەختێ
زەماونکەرەکێ گەرمێ بیێنێ بە زورنا و دهۆڵەکەی ، دەیان قسێ لەذەفیشا واتێنی بە
رەحمانی داماگی، ( دەش ڕەحمانەی پێسە پاسە، دەش ).
گۆرانی واچەکا گوڵپی: کە بەشداریشا کەردەن وگۆرانیشا واتێنێ زەماونەکا گوڵپیەنە ( کۆنتەرین گۆرانی واچ گوڵپەنە لاۆ حمە
بیەن "محمەد مسەفا "
ئەشناسیا بە حەمە حاجی ، مەحمودە سوری برایچش واچێ، هەرپاسە بە نونگەو ئانەی
گەچێنە نزیک بێ جەگوڵپی فرەو زەماونەکانە کاک عوسمان هەورامی ئێ گۆرانی واتەی
،دیەنم جەنی کاک عەلی گوڵپی گۆرانیشا پیوەرە واتێنێ پەی زەماونێ، ئینجا کاک حاجی
عەبدوڵا و مام فەتاحی چنی کاک ئەمینی برایش و ڕەحمەتی مارفی برایش،ڕەحمەتی غەفور
تەوفیق، گرد دەنگشا وەش بێ و فرەو جارا گورانێێ واچێنێ، ڕەحمەتی فایق حاجی سادەقی،
ڕەحمەتی سەی نەسرەدین ،حمەخان عەزیز، عەبدوڵا حمەخان ، کاک خەلیل عبدالکریم و
ئەبوبەکر ئەحمەد بەگی، هەرپاسە کاک حمەعەلی گۆرانیێ سۆرانی و شارەزورێ واچێ،نەک
هەورامیێ، ئیسایچ ئەمین وحاجی محەمەدی جار جار گۆرانێی ماچۆ، مامۆسا ئارامیچ دەنگش
فرە وەشبێ بە گەنجی گورانێێ واچێ بەلام کە بی بەمامۆسا تەرکش کەردێ، کاک ڕەوف
حمەسەعید ،یۆ جا گەنجابێ کە لاسایی حەسەن زیرەکی کەرێوە ،دایم مەکتەبەنە مامۆسا
ورش ئێزنێ، دەشتو دەر هەمیشە خەریک بێ،
بەلام داخەم مەشۆ ئیسا مەواچۆ، چێ دمایۆ لالۆ غەفورو کاک ئەمین لوێ بەغدا جە
ئیزاعەو بەغدای گۆرانیشا تۆمار کەردێ ساڵەو 1977 ،کۆمەلێ ژەن وکناچە ئەوسا
گۆرانیشا واتێنێ ،پێسە مەتی" ڕەحمەت
پی مەردەکاو عەمری دریژ ولەشساخی پەی زینەکا" (ئامینێ و لەیلێ و ئایشێ حمەو کاکە
خانی هەریەری والێ عەلی گۆرانی واچی ، کافێ و مەحبوبێ حەمەو رۆسەمی ،بەیزاو حمە
چەقی،مەتی مەجێ حاجی رەحمانی،کافێ ڕەحمانە سیاوی و گوڵێ واڵێش) ماچا کافێ فرە دەنگش وەش بیەن.
ئا زەمانە فرەو زەماونەکا داوەت و دەگایەکا تەری کریان پەی بەشداری
کەردەی و ورپرای، پەی نمونەی جە بیارێوە
ئامێنێ پەی زەماوونەو لالۆسدیق و ئەحمەدو خاڵەی، ئانە با باسو گەچێنەی و نارنچلەی
نەکەرمێ ،کە فرەو زەماونەکانە بەشدارێ بینێ بۆنەو قەومایەتی و فرە ئامۆشۆیو تێکەڵاویۆ.
خەڵک و
ئەوسای سادە و دڵ ساف بیەن ،ژیان سادە بیەن، دڵ وەش بیەن وەرو ئانەی هەردەم کەیف
وەشی بەردەوام بیەن دلێ خەڵك و لادەگاینە، هونەر و فەرهەنگ و باو باپیرانیشا
پاریزنان ،جە ورپرای، گۆرانی واتەی،گەمەو کێڵی، واتەو وەڵینا،مەتەڵێ..هتد.
ویرەوەری منەنە نەدیەنم و نەژنیەنم کە ژەن بەژەن کریۆ دەگاو گولپیەنە، بەلام
دماتەر ساڵە و 1978 بارشا کەردیمێ پەی ئۆردوگاو زۆرەملی خورماڵی چن
خانەوادێ گوڵپیی ژەن بەژەنشا کەرد بەین وێشانەو چنی دەگایەکا تەرو هەورامانی.
پۆزش: داواو عەفوێ کەرو ئەگەر نامێ کەسێم
نوستەبۆ چەنی لەقەبەکیش،تەنیا وەرو ئەشناسیای بیەن نەک هیچی تەر، گرد ئەذا و تاتەو
براو کەسوکاری بە ڕیزێ منەندێ یەک دنیا
ئیحترامم هەن پەیشا.
هەرپاسە داواکارەنا جە گوڵپیەکا هەر کەس یاگێ وێشۆ هامکاریم کەرۆ پەی دۆڵەمەند کەردی ئی
باسیە، ئەکید من چیوم ویر شیەن. با پیوەرە زەریف تەرو دۆلەمەند تەرش کەرمێ، چی باسەمەنە چن کەسێم دۆنێنێ و لاو ئادیشاوە کۆمەلێ راسیم ئاردەن.
د.ناجح گوڵپی
14/9/2016
