کوٙبەرهەمو د. ناجح گوڵپی
خەزیٛنێوە پەڕگەوهەرو زوانو گوٙران-هەورامانی
جەماوەو حەوت ساڵان کە خزمەتو فەرهەنگ و زوانو گورانی
و هەورامانینە بیەنا، بەرویرەکەم پەنج کتیٛبیٛ پەڕگەوهەریٛنیٛ کە خزمەت بە
کتیٛبیانەو هەورامانی مکەرانیٛ. گردیچ باسیٛ زوانئەشناسینیٛ، کە زانشێ تازەن پەی
وەنیاراو هەورامانی، هەر جە بەشەکاو دوای، نامیٛ، یاگەگیرونامیٛ، یاوەرنامیٛ،
یاوەرکەردەوە، ئامرازیٛ، کەردەوە، چەمە و ژمارە، چەنی ڕیٛخەو چەمەی بەرماری و
واتیٛش پەنە وەش مەکەری، ماناو زوانی، ماناو واتچنی و دەسەواتیٛ و قسیٛ و چەنای و
واتواچی، شوٙنیرە چەنیەتی سازنای واتیٛ زوانو هەورامینە بەپاو یاسا ڕازوانیەکا.
یوٙ: ڕازوانو هەورامی، بەرگی یوەم چاپو 2018، جە
ئیسەنە لواناشۆپوٙرە، هەڵەو کەم و کوڵیەکیٛش وەشیٛم کەردیٛنیٛ، بابەتیٛ ڕازوانییٛ
و زانشتییٛم وستەنسەر ئامادەن پەی چاپی دووەمی. ئی کتیٛبە باسو بەشەکاو دوای
مەکەروٙ parts of
speech .
دویٛ: ڕازوانو هەورامی بەرگی دووەم، چاپو 2019 بە دەسکاریوە و زیادکەردەی چندەها بابەتیٛ
زانشتییٛ پەیش تازە بیەنوە، کە بە هەسو هوٙڵی باسو چەمەین زوانو
گوٙران-هەورامانینە، Infinitive
in Gorani language ئامادەن پەی چاپی دووەمی.
یەریٛ: ڕازوانو هەورامی بەرگی یەرەم کە باسو دەنگسازی
و دەنگئەشناسای مەکەروٙ، Phonetic and Phonology چاپو 2020 دەنگەکیٛ
زوانی چەنی بەرهەم مەیانیٛ، چەنی پەیڎا مەبانیٛ، چەنی هەننە و واتیٛ وەشە مەکەروٙ،
فاڕیای دەنگی و فوٙنیمی، فاڕیای زوانی، دەنگ و نویسە زوانو هەورامینە بە شیٛوەی
زانشتی باسکریێنیٛ، بابەتیٛ تازیٛش کەوتیٛنیٛ سەر و ئامادەن پەی چاپی دووەمی.
چوار: مانائەشناسای و مەبەستئەشناسای semantics and pragmatics چاپو 2022 باسو ماناو زوانی و جوٙرەکاو مانای و
هیٛمازانای، ماناو قسیٛ و قسیٛکەری و ژنەوای چەنی لەیەکەمەدریوٙوە، مانای ئاشکرا و
مانای شاریێوە، مانای ویٛڕاسەو ناویٛڕاسە، فەرهەنگیە و پەیوەندیدارە، بەهەر حاڵ
زوان بەبیٛ مانای یانی هیچ، ئەر ماناو زوانی نەزانی یانی هیچش چەنە نمەزانی.
بابەتێوی تازەن پەی هەورامانی.
پەنج: بنەڕەتیٛ واتسازی Principles
of Morphology چاپو 2023 باسو چەنیەتی سازنای واتیٛ مەکەروٙ زوانو
ویٛمانە، مۆرفیم و ئەلۆمۆرف ئاشنا مەکەروٙ بە هەورامی زوانان، نونگیٛ فاڕیای دەنگو
واتیٛ یام لاشیە نویسێ جە واتیٛنە گردی ڕوٙشن مەکەروٙوە، جوٙرەکاو واتسازی مەوزوٙ
ڕووە، ئەرەتاشای Derivation و گیٛڵای Inflection و ئامیٛتەکەردەی Compounding هەرپاسە
جوٙرەکاو موٙرفیمی شی و شیتاڵ مەکەروٙوە تا وەنیاری هەورامی بە زوانو ئەڎاو ویٛش
بزانوٙشا.
مەشیوٙ ئانەیچ بواچمیٛ ئی کتیٛبیٛ پەی خزمەتو فەرهەنگ
و زوانو هەورامانینیٛ سەرو خەرجو کیسەو
ویٛم چاپیٛ کریێنیٛ و بە سەوقاتی مدریانیٛ و دریاینیٛ بەهەرکەسێ کە ئەهلو زانشتی و
وانای بوٙنە و بیەن.
ناجح گوڵپی 22/11/2023
.
