ئەرکو
نویسای (بنویس) هەورامی
کاتێو
کەسێوی هەورامی نەمۉنویستەی بە زوانو وؽش، ئەکید دڵسۉچنو زوانی و فەرگەنگەکەیشەن پەوکای منویسۉ بە
نیازو ژوژنای و وەڵؽوستەیش. ئارۉنە سەرنجە مدەیمؽ خەریکەن فرێو جە قەڵەمە
هەورامیەکا نەمێنؽ نویستەی. تا خایت کتؽبؽچشا نویستؽنؽ، پەوکای پەیوازەن بڕێو دەسورؽ
هەنؽ جە نویستەینە مەشۉ وەرەچەمشا بگؽران پەی ئانەی خزمەتەکەشا یاگؽ وؽش بگؽرۉ نەک
دماڕۉنە پەشیمانیش دماوە بۉنە.
نویسا مەشۉ بەڵەدو جۉرەکاو دەسەواتؽ (دەسەواچؽ-لکە-عبارە)ی
بۉنە زوانەکەو وؽشنە. مەشۉ دەسەواتؽو نامؽ چەنی دەسەواتؽو یاوەرنامؽ جیا بکەرۉوە.
مەشۉ بزانۉ چەنیشا بنویسۉنە، پەی نمانی دەسەواتؽو نامؽ یانی دوؽ نامؽ وزیوە سەرویۉی-پاڵو
یۉی (ترکیب ازافی) کە بە یاردی (و) مەسازیۉنە، مەشۉ بلکۉ واتؽ یوەمؽرە، نەک هاڵیگا
وەشبکەری میانو هەردوە نامەکانە، پسەو:
مەڕەو
شابازی. نەک مەڕە و شابازی*.
دەگاو
گوڵپی. نەک دەگا و گوڵپی*.
ئی
بابەتە فرە دورو درؽژەن، هەورامی نویسەکؽ فرەتەرین هەڵە مەکەرانؽ چی بابەتەنە.
هەڵبەت بابەتو دەسەواتؽ جە کتؽبو (واتچنسازی)نە بە تەسەلی باسکریان، هەرپاسە بە
ڤیدۉ فەیسبوکنە و یوتیوبو وؽمنە نیانمەرە.
هەرپاسە
جە سازنای دەسەواتؽ یاوەرنامؽنە (تەرکیب وسفی) بەهەمان شؽوە هەڵە مەکەرانؽ. تەرکیب
وەسپی زوانو ئؽمەنە بە یاردی (ی) مەسازیۉنە، سیفەتێو وەسپو نامەکؽ مەکەرۉ، پسەو:
کۉچی
دمایین. نەک کۉچو دمایینی*.
ڕۉحی
پاکو کاکە جەمیلی. (ڕۉحی پاک). نەک ڕۉ‌حو پاکو کاکە جەمیلی*.
هەڵبەت
تەرکیب وەسپی فرە دورو درؽژەن جۉرەها نمونؽش هەنؽ کە ئیسە چؽگەنە لازم نیەن
بنیەیمؽشارە، چون جە کتؽبو (واتچنسازی) بە تەسەلی باسکریاینؽ.
ئاقیبەت
بەڵەدی جە سازنای دەسەواچؽ بەگردو جۉرەکاشەوە یانی سازنای واتچنی بە ڕاسو دروسی.
ئەگەر زانات واتچن (ڕؽسمان) بسازنی، ئاوەختە مزانی چکۉنە خاڵە بنیەیرە، یام چکۉنە
لازمەن کۉما بنیەیرە. یانی بەڵەدی پەیدامەکەری جە بەکارئاوردەی خاڵبەندی. پەوکای
پەی نویستەی مەشۉ سەرەتاوە بزانی دەسەواچؽ ئیجا واتچن، ئیجا پەرەگراف دماتەر متاوی
واتارە-مەقالەی درؽژ بنویسی. با بزانمؽ پەرەگراف چؽشەن و چەنی بنویسمؽش.
پەرەگراف
پەرەگراف ڕزێو واتنچنؽنؽ، کە بابەتێو باس مەکەرانیٛ. بەپاو جۉرو
بابەتەکەی پەرەگرافەکە پەیش هەن درؽژ بۉ یام کۉڵ، واتچنێو یام دوؽ پەیش هەن بیاوان
دە واتچنؽ زیاتەریچ.
پەرەگراف
پارچێوی نویستەی جیان، کە باسو بابەتێوی دیاریکریای مەکەرۉ. بەهاڵیگایێو سەرتاوە نەمۉوەنە.
بەشێوەی
لاوەکین جە واتارێوؽ نویسیێ، جە واتچنێو یام زیاتەری مەسازیۉنە.
بەشێوی
کوڵەن جە تێکستێوی نویسیای، واتچنێو یام زیاتەرەن، بە هؽڵەی تازؽ دەسپەنەمەکەرۉ،
باسو یەک (ویری، ڕووەدای، وەسپێوی) مەکەرۉ.
بەگردینی
پەرەگراف جە واتچنێو یام زیاتەری مەسازیۉنە، دەورو خولو یەک ویریرە مەیۉ، سەرەتاوە
بە هاڵیگایێوە وؽش مە ونارۉ. گردو واتچنەکا هەنؽ خزمەتو تاقە ویرەکەینە. پەرەگراف
سەرەتا و دلؽگەر و کۉتاش هەن.
نویسا
دماوئانەی فؽرو هونەرو نویستەی مەبۉنە مەشۉ فرە هاگادارو پەرەگرافەکاش بۉنە، بزانۉ
چەنیشا بونارۉ. بزانۉ چەنی دەسپەنەبکەرۉ، گردو تێکستەکەی مەشۉ خزمەتو ویری سەرەکی
پەرگرافەکەینەبۉ، بەشەکاو پەرەگرافی مەشۉ خزمەتو ویری سەرەکی پەرەگرافەکەینە بۉ.
چی کاتنە پەیش هەن پەرەگرافەکە گولانە بۉ تەنیا جە یەک واتچنی یام دوؽ واتچنان
بسازیۉ، یانی دوؽ خاڵؽ منیەمؽرە. ئەر دە واتچنؽ بۉ یانی لازمەن دە خاڵؽ بنیەمؽرە،
ڕەنگا چندە کۉمایچش لازمؽ بان. نمەبۉ پەرەگرافێو چەنی یۉتەری تؽکەڵ بکریۉ، چون
هەریۉشا باسو ویرێوی مەکەرۉ.
چؽوێوی تەری گرنگ هەن مەشۉ وەرچەمش بگؽرمؽ،
ئادیچ ملکەچو خاڵبەندی بیمؽ، چون ئەرەنیایو کومای و خاڵؽ (،-.) مدرای و هەناسەدای
جە وانایەو پەرەگرافەکەینە نیشانە مەدۉ، کە فرە گرنگەن پەی ئاکەسیە کە موانۉشەوە.
هەرپاسە دیمەنێوی جوان مەدۉ بە نویستەکەی.
ئاقیبەت
ئەگەر
گەرەکت بۉ واتارە-مەقالە بنویسی (چندەها مەقالؽ یانی کتؽبب)، لاو کەمیوە مەشۉ
بەڵەدو گولانەتەرین پەساو نویستەی بینە یانی دەسەواچؽ، چون دەسەواچؽ بنەڕەتەن پەی
سازنای واتچنی، هەرپاسە چندە واتچنێو پەرەگراف مەسازنۉ، چندە پەرەگرافێو واتارە
مەسازنۉ، چندە واتارؽ کتؽب مەسازنانؽ. چەنی نویستەی ئینیشا واتؽم، مەشۉ بزانی چکۉنە
خاڵە، کۉما بنیەیرە، نەک هەر ئانە مەشۉ خاڵبەندی تەمام وەردەسبۉ پەیت تا
نویستەکەیت ئەکادیمی بەربشۉ. نەک لاپەلێو بنویسی تا کۉتا یەک خاڵ بنیەرە و چندەها
واتچنؽ و پەرەگرافؽ تؽکەڵؽ ببانؽ ببۉنە بایسو سەروەنەشؽویای.
ناجح
گوڵپی 31/1/2025
