نمانای- نمانا- نمان-نمانە

 نمانای- نمانا- نمان-نمانە

ئەرمانای- ئەرمانا- ئەرمان-ئەرمانە

هەورامینە نمانای-ئەرمانای یەک ماناشاهەنە. فارسینە (نمودن)، کوردینە (نواندن)، پەهلەوینە (نموتنnimutan)، یانی هەر یەرە چەمەکؽ (ویەرؽنؽTransitive infinitive )، متعدی- تێپەڕ.

چؽگەنە گەرەکمەن چەمببڕونە واتؽ (نمونە)ی، کە جە زوانو فارسیوە، چەمەو (نمودن) هۉرگیریان. هەرپاسە بڕێو واچؽ تەرؽش چەنە مەگیریانؽ، (نمایش، رانمایی، رانمونی...) ئەگەر سەرنجەو ئی واتا بدەیمؽ مەیانؽوە سەرو چەمە هەورامیەکەی (نمانای) چون نمایش، ڕانمایی جە نمانیوە نزیکەن تا نمود.

نمانا- قەدو چەمەکەین (بن گذشتە). بەهەورامی کەردەوەی ویەردە. پسەو. دکتر دەرمانش پەی نمانان، یام پەی ئەرمانان.

نمان- ڕؽخەو چەمەکەین (بن حال) پسەو نامؽ هەرمانە مەبەرۉنە هەورامینە، ئی قوماشە نمانش جوانەن. دیواری تەوەنین چەنو دیمەکا نمانش جوانەن.  زوۆن ئەژنیەنم ماچا نمونش جوانەن.

وؽم منمانو. (وؽم مرمانو. وؽش مەنمانۉ. وؽش مرمانۉ. وؽش ئەرمانؽ. وؽش نمانؽ).

ئەگەر (ە) بؽگیری کوڵ بوزمؽ سەرش، نامؽ چەمەی(اسم مصدر) وەشمەکەرۉ.

نمان+ە= نمانە. پاسەبی متاومؽ بواچمؽ نمانە-نمان، جیاتی نمونەی.  

داخەم مەشۉ زوانو ئؽمە بەکارئاوردەیش نیەن(فرەکەمەن)، یانی نویستەی و دوای کەمەن،  پەوکای ئی جۉرە واچؽ لاماوە غەریبؽنؽ. وەڵؽنە واتمان (نمان) یانی دیمەنە، نیشاندای، وؽنە،نمایشکەردەی. بەکوڵی هامتاو نمونەی فارسین، پەوکای من چیولای جیاتی نمونەی (نمان-نمانە) بەکار مارون نویستەکامنە. جیاتی ئانەی بنویسو پەی نمونەی، منویسو پەی نمانی.

مەحبوب جەلالێ، لەیل ئاسا حاڵێ   سەرو باڵایێ، حوری نمایێ.

سەمای دەسمالان، ڕەمای نەوهاڵان   نەمای مەلالان، نمای وەشحاڵان.

ئیشارەی وە ناز لەبخەندەی وە نەرم   نمانای خاڵان نە تۉی پەردەی شەرم.

ئینە مەولەوی فەرماوان جە شعرەکاشنە، ئەچا کاتوزەمانەنە (نما) بەکارئاومان.

د. ناجح گوڵپی 17-5-2025