واتەو دەسەو راوەبەرو کۆنفرانسی

واتەو دەسەو راوەبەرو کۆنفرانسی

 بەنامی خوای

 ئازیزا .. نوێنەراو پەرلەمانی و حکومەتی و کەسایەتیە سیاسی و پارتەکا وھەرمانگا حکومیەکا، نوێنەراو کۆنگرەی نەتەوەیی کوردسانی و پارێزگاری و قایمقامی و مامۆسایاو زانکۆیی و پەیمانگاو کەسایەتیە کۆمەڵایەتی و رۆشنویریەکا و نوێنەراو رێکوزیا مەدەنیەکا. میمانە ئازیزەکاو ھەورامان و ئەودیمی و کەسایەتیە رۆشنویریەکاو زەنگەنەی و باجەڵانی وکاکەیی و شەبەکی و عەبدولمەلیکیەکا..ئامادەبیا کۆنفرانسی... خەیر ئامایدێ سەرو چەماما.

یاگی دڵوەشیمانە کە جە شارو شەھیدانە "ھەڵەبجە" پایتەخت و ئاشتینە چەنی شمەی ئازیزی پێوەرە کۆنفرانسێ سەرو ھەورامان ئەژناسی بەرمی ڕاوە .

 وەختەکارێ  ئارۆ دەستمابەردەن پەی گێرتەی ئی کۆنفرانسی، زانمێ ئی کۆنفرانسە ھەوڵی سادەو ناوچەیین و لاکەردەیوە نموونەیین جە بنەما رەسەن ودێرین وسەنگینەکا هەورامانی  ، وینمێ جیھانگەرایی بە وێش و هورووژمەکاشۆ  پێسە وەیشوومەی وێش کەرۆ دلی کلتوورە جیاوازەکارەو ھەوارو ئا کلتوورا تێک مدۆ کە بێ ساحیب و کەم توانێنی  و جەلاو وێشاو دەورو بەریشاوە پەنا وزیێنی ، بێ رەحمانە کەرۆشا گڵوەو وێشەرەوە جیاتیشەنە یەک رەنگی و یەک دەنگی مدۆ بەرەو یانەیشاوە.

 خەمو کۆنفرانسی ئاخەمە نەتەوەییەنە کە ھەزاران ساڵی نەتەوەو ئێمە گیان و بیەیشەنە پارێزنانش وپەشتاو پەشت  دانش دەس و وەچەکاشۆ، جە ڕاو ئاذینە شۆڕش و ونی ومانیاو تەقەڵای سەدان ساڵەش پەی خەرجدان.

  بەپاو ئا زانیاریا کە یونسکۆی وستێنی ڕوە، زوانی ھەورامی یۆن جا زوانا کە مەتەرسی فۆتیایش  ئینا سەرۆ ،پەوکای گردما  بە ئەرکو سەروشانەیش بزانمێ کە جۆرەھا ڕا گێڕمینە وەر پەی ئانەی نازمی زوانەکەما فۆتیۆ، یۆ چا ڕا سەرەکیا ھۆشیارکەردەیوەی تاکەکا کۆمەڵگاین ، و بەستەی کۆنفرانسی رایێنە پەی ئا ھۆشیاریە، تا بتاومێ بەشێ جە قەلەمە بە بڕشتەکا کۆکەرمێ و ھۆشیارێ دەیمی بەگردڵایی کە ئێمە زوانما و کلتوورما چندە ئینا خەتەرەنە.

 شۆنەو ئانەیچەرە گەرەکمانە واچمێ پێ دەسەڵاتە و وێماو چڵاکنمێشرە کەجە ھەرێمو کوردەسانینە بایەخ دای بەکلتوورو ھەورامانی جەگردو ویارەکانە پەراوێز وزیان و ، وەختێ ماچمێ کلتوورو ھەورامانی پەراوێزکەوتەن، یانی مۆرکەو رەسەنایەتی نەتەوەیت لەکەدار کەردەن و تەقەڵەو قۆتنایت کەردەنۆ، بە تایبەت ویارو میدیای و پەروەردەیو فێرکەردەی بەزوانی ئەدایی "ھەورامی"ینە ، وەختەکارێنە ھەورامیەکێ ھەرگیز کەمتەرخەمی نەبینی جە ئەرکەکا سەروشانەیشا وەرانوەرو کوردەسانی، قوربانیەکێشا شاھیدی مدا.

 نەتەوەو کوردی  مەشۆ شانازی کەرۆ بە  دەولەمەندی ، فرە کەلتوری وفرە زوانیشۆ ، مەنەیۆ کلتوورە ناوچەیەکا  و زوانەکا ، یانی گەشەو و گەورە بیەی کەلتورەکەیش، ھەڵبەت فۆتیای زوانی یانی فۆتیای کەلتوری، ویەردەی، یادەوەری و مێژووی و ھونەری،چندەھا چیوێ تەری کە ئینسانەکا بە درێژایی مێژووی بەدەسشا ئاوردێنی.

 ئارۆ  پیوەرە کۆبیێنمێ تا تەوەنێ بنیەمێ دلێ دیوارو پاریزنای فەرھەنگو ھەورامانی جەگرد بوارەکانە،ھەنگامەکاما چنی ناوەندە ھەورامیەکا و نوسەرو ڕۆشنویرە دڵسۆزەکاما ئاویزان کەرمی و پێوەرە را چارەی ھێقم پەی پاریزنای کەلتور ھەورامانی بنیەمێڕە، دیارا ئینەیچ گیان و چەنەویەردەی و چەنەبریایش گەرەکا وئەرک و گردلاێمانە شانە دەیمی چیرش.

ھەورامان ساحیب گەنجینی دۆڵەمەندی کەلتورین، کە جە دێڕ زەمانۆ تائیسە شانازیش پۆکەرمی، ھەڵای چندەھا لایەنی شاریاوێش ھەنی، ئەشۆ ئێمەی دڵسۆزو قەلەم بەدەس پەیجۆر کارەکیما لاش وەنەکەراوە ، چیولای ھەوڵەکاما زیاتەر کەرمی پەی ئیستەیۆ ئی لایەنە گم وبێ شۆنا، ھەرپاسە ھەوڵەکاما یەکانگیر کەرمی پەی یەک رانویسو یەک رازوانی ھەورامی ،جەڕاو کۆنفرانسو کۆڕ و سیمیناریوە متاومێ خەڵکەکەیما هاگاذار کەرمێوە و ھانیش دەیمی و ھەست بە وەرپەرسی کەرۆ ھەوڵێبدۆ پەی ژیوایۆ فەرھەنگەکەیش.

مادام ئاواتما گێلاین شۆنەو ئامانجێ زەریفیرە،، ئارۆ یاسەوای دەسما گنۆ، مادام گێڵمی شۆنەو زەمینی پەپیت و فەڕیرە بەی کشتو کیاری،ئەکید دەسماگنۆ و کەرمیش کیاری و بەرهەم مدۆ و ژیونوما.

 جە کۆتایینە سوپاس و دەسوەشی ڕاوەبەرا کۆنفرانسی پەی ئانیشا کە وەڵتەر ھەنگامێ چیمنیشا گێرتینەوەرو ئارۆیچ خەمی چینەشا ھەن، وەگردو ئانیشا کە ھامکارێما بێێنی ،بەتایبەتی کۆنگرەو نەتەوەیی کوردسانی ، کە ھاندەرو ھامکارما بی ، ھەرپاسە دەسوەشی پەی پاریزگار و قایمقام و ھەڵەبجەی و دەزگا ئەمنیەکا ھەڵەبجەی کە پەشتیوان و ھامکارێما بێنی پەی بەستەی و سەرکەوتەی  کۆنفرانسی.

 دوبارە سوپاس و شمەی ئازیزی و دەس وەشی پەی گرد ئاکەسا کە ھامکارێ ما بینی و مانیێنێ چنیما.

  

  دەسەو ڕاوە بەرو کۆنفرانسو هۆرامان ئەشناسی

                      20/4/2017