کؤنفراسو هۏرامان ئەشناسی

 کؤنفرانسو هەورامان ئەشناسی ꞉

گەرکمانە بە کوڵی و پوختەی گرنگی بەستەی کؤنفراس و هەورامان ئەشناسی باس کەرمې

ماناو کؤنفرانسی یانی  گلیرؤبیەی فراوان ی ڕؤشنویری، کەلتوری،  یان هەرجؤرێ تەر، چېرو نام و نیشانێ دیاری کریاینە، چېگەنە کؤمەڵێ تؤژینەوې و بابەتې پێشکەش کریا و گفتوگؤشا سەرکریؤ ،هەتا پیوەرە بتاوا کێشێوە  چارەسەر کەرا یان بابەتێ  جە بابەتەکا شیکەردیؤش پەی کەرا، کؤنفرانس ،زانکؤ یان دەزگێوە تایبەت ،ڕێکخراو ،حزب ،بەسؤش،چن ڕوێ خواینؤ،پەی گفتوگؤکەردەی سەرو بابەتەکا کؤنفرانسی،دماجار بە راسپاردە و ئەنجام نامە کؤتایش مێ، وچندین جؤری کؤنفرانس هەن (کؤنفرانسی ڕؤنامەوانی، کؤنفرانسی نیشتمانی، حزبی، ناوچەیی،جیهانی،ئاشتی، ڕؤشنویری،کەلتوری،رێکخراوەیی....هتد)،

 کؤنفرانسو هەورامان ئەشناسی ꞉

  (ویرۆکەردەی،قسەکەردەی،وانای ،نویستەی بەهەورامی)، دروشمە و سەرەکی کؤنفرانسینە ،وچەمەڕانمې کەچیولای خەڵکو هەورامانی پشتیوانی و هامکاریما کەرا پەی بە جا ئاردەی دروشمەکا،ئێمە ئەگەر سەرو ئی دروشما بلمې ، متاومې هەرمانێ خاسە و خزمەتی خاس بە زوانی هەورامی کەرمې، جەگردو بوارەکا ژیانینە، گەرەکمانە تاقە کەس ، هەم گردو خەڵکو هەورامانی پېوەرە وېشا دروس کەراوە هەورامیانە ویرې کەراوە، ئینە بؤ بنەڕەتێ هېقم پەی دوبارە ئەرەمەرزنای و پارېزنای هەورامانی و کەلتورەکەیش و بؤ بە دیوارێ قایم و یانەکەیما ، چنی ئانەی ئینسانێ هەورامی تنو تؤڵ پەیدا بؤ کە هؤگری و دڵسؤزیش پەی کەلتورەکەیش و هەورامانەکەیش هەن، هؤشیاری تەمام دروس بؤنە پەی پێوەرە هەرمان کەردەی، پێوەرە یەک قسەو یەک بڕیار، سەرکؤتەی یەکجاری و پاریزنای کەلتورو  زوانو هەورامی.

قسەکەردەی بەزوانی ئەذایی مافو گرد ئینسانێن، ئێمەی هەورامیچ مەشؤ تەقەلا دەیمې ،گر وەختێ و جەگر یاگێنە ویرما نەشؤ بەهەورامی قسې کەرمی،دلی یانەو کڵفەتینە،بازاڕەنە، سەفەرەنە.....وە نازمې چینەی زیاتەر زوانی هەورامی کاڵ بۏوە،چون زوانێ پی ڕەسەنیە کە یاگە دەسش دیارا مێژوو ئەدەب و ناوچەکەینە،نمەبؤ بازمی دما هەناسەکاش بدۏ،بەڵکو  گیانش کەرمیوە پؤرە و پېسە جارانی بارمیشؤ ڕیزو زوانە زیننەکا ناوچەکەی و جیهانی.

هەرپاسە وانای بەزوانی ئەذایی  مافی بې ئیلاو ئەولان و کەس نمەتاوۏ زەوتش کەرؤ ،مەشؤ گرکەس بوانؤش قؤناخەکا سەرەتاو مەکتەبینە، هەتا فیرو پیتەکا،واچەکا ،ڕازوانی هەورامی بانە، ئێمە ئەگەر مەکتەبەنە بەهەورامی بوانمی ،ئاوەختی بەئاسانی متاومی بنویسمی، متاومی زوانەکەیما  زیننەو پایەدار کەرمی،تەرجمەش پنە کەرمی،کتیبی زانستی و میژوویی و هەمەجؤرش پنە هؤرگیڵنمی ،کؤڕو کؤنفرانسەکانە بەشداریش پنە کەرمی...هتد

ئی دروشمې خەڵکی دڵسؤز و ئەنەیاوا، نەفەس دریژ، بەردەوامی هەرمان کەردەیش  گەرەکا پەی ئانەی جا بەجا کریا.

لای واریوە نونگەو بەستەی کؤنفرانسو هەورامان ئەشناسیتا پەی باس کەرمې꞉

1.       نامې هەورامان و هەورامی  خەریکا  کاڵە بیېنؤ دلی  خەڵکینە، دلې دام و دەزگاکا  حکومەتینە، ناوچەکەنە، ئېمە گەرکمانە نامەکی بارمێوە یاگی وێش و دەورو کاریگەریش پەی گېڵؤوە، ئینەچ هامکاری و پشتیوانی  خەڵکو دڵسؤزو هەورامانیش گەرەکا، چنی حکومەتی .

2.      هامکاری وپشتیوانی یؤگرتە نەبیەن بەینو خەڵکو هەورامانینە (ئەنجمەن) ،هەرپاسە حکومتیچ بەرنامەش نەک پەی هەورامانی نەبیەن بەڵکە پەی گردو کوردستانیچ، جە گردو بوارەکا ژیانینە،تا پێوەرە بلا دەم و گرفتەکاوە و چارەسەرشا پەی بیزاوە، کؤنفرانس تەقەلاو دروس کەردەی ئی هامکاریە مدؤ ( ئەنجمەن ).

3.       ئەگەر سەرنجە دەیمی هەورامان  جە گردو بوارەکانە (ئاوەدانی، پەرووەردە، میدیا )  کەنار وزیان، جەلایەن و حکومەتیوە ،هەڵبەت ئی کەنار وستەیە  تەنیا  بێ باکی حکومەتی نەبیەن ،گېرە خەلکو هەورامانیچ  گؤشش نەدانو نەلان شؤنیشەرە، ئێمە مەشؤ چارسەر پەی ئی کەنار وستەیە بیزمێوە، بە هامکاری دڵسؤزەکا هەورامانی، و کؤنفرانس یاگی ئیستەیؤ چارەسەر و گرفتەکان ، نونگە (هؤکار) کا بێزمیوە و دەرمانشا کەرمې.

4.       هەورامان زەرەرو زیانێ  کەلتوری گەورەش وەرکەوتەن ،جەگردو بوارەکانە، بەتایبەت  "هونەرو فەرهەنگ،کسم، ئەندازیاری "، جە گرد لاێوە  دەس دریژی کریان سەرش، دلېنە بریان،دزیان...هتد " کۆنفرانس  قەوارەکەیشا بەر وزؤ و هەنگامە منیؤ پەی چارەسەریشا ".

5.      کؤنفرانس " ڕەسەنی هەورامانی و هەورامی دوبارە مارۆوە دلی و چەسپنوش، دەروازەو هامکاریو پشتیوانی زیاتەر کەرۆوە پەیما "

6.      قوربانی دای هەورامانی،،بەخشندەیی هەورامانی هەمدیسان مارمېوە وەرو چەما، کە جەگردو بوارەکانە هەورامی خزمەت و نیشتگایش کەردەن  ( مێژوو،ئەدەب، سیاسەت،نیشتمان پەروەری ،ئاوەدانی،کسم ...هتد)

7.      کؤنفرانس نونگێوەن پەی جەم کەردەی پشتیوانی و هامکاری هەورامانی و فشار وستەی سەرو لایەن و دەسەلاتی تا زیاتەر لاکەرؤ لاو هەورامانیرە.

8.       کؤنفرانس دەلاقې  تازە کەرۆوە  سەرو زینە کەردیۆ ، گفتوگؤی، لێکؤڵینەوە ی زیاتەری سەرو هەورامانی،هامکاری زیاد بؤنە پەی ئاوەدان کەردەیۆ،ئەرەنیای دەزگاو تۆژینەوەی پەی هەورامانی..هتد.

9.      کؤنفرانس تەقەلا مدۆ ، داواکەرۆ جەگرد لایوە هامکاری پاریزنای زوانو کەلتورو هەورامانی کەرا.

10.  کؤنفرانس کۆشش کەرؤ پەی یۆگرتەی جیاوزیەکا جە ڕازوان و تەختەکریل و نوسیتەی هەورامی و ئەرەنیای یەک تەختەکرێلێ و یەک ڕانویس پەی کتېب و  وەلا کریایەکا ،هەرپاسە  جە ئینترنێتیچنە.

11.  کؤنفرانس هەمیشە هەولو تەقەلا مدؤ کە چارەسەری گونجیا پەی کێشەکا بێزؤوە، جە ئەرنیشتەی  کریاوە  یان وزیارەنە.

12.  سەرکۆتەی کؤنفرانسی  بەنندا  سەرو ( سروشت و ئا بابەتا کە پېشکەش کریا ئایا جە ڕوە و زانستیوە بەقوەتینی یان  نا ،هەرپاسە تاچن مانیایی وهەولو تەقەلای دلسؤزانە هەن پەی سەرکەوتەی کؤنفرانسی، وریایی و زانایی بەشدارا کؤنفرانسی، نەرمو نیانی پەی چارەسەرو کێشەکا و ئەگەر کریؤ چارەسەری دلې راسە ورچنیؤ).

13.  کؤنفرانس یاگی جەمؤ کەردەی گردو قەڵەمە ڕەنگینەکا هەورامانین.

               د.ناجح گوڵپی

                 07501115808 

           n.gulpy@gmail.com

najihgulpy.blockspot.com