پڕچکەی تڵاین

پڕچکەی تڵاین

زەمان و زووی جە هەورامان چەنی کڵاو زەڕی پڕچکە یچ دریان پەراوێزەکەیش تا زەریفتەر برمانۆ، پڕچکە مورێ وردی تڵاینێ بینێ زەریف پێکیانۆ عەینو قایشێ باریکی گولانە کە نزیکەو 10 سانتیمەترا یان زیاتەری پان بیەن و 30 تا 40 سم درێژ بیەن ، پڕچکە بە خەیاتەی ئەسڵ و مورێ تلاینێ پێکیۆوە .
،دریان ئۆ پەرواێزو لای واری کڵاوەکێ ( فێسە) ،فێسە سیاوە بێ ،دەوران دەورو فێسەکێ بە زەڕی چەرمە پۆژیابێرە، دلێراسە و فێسەکێ پەنج قەرانێ گەورە پەنەش واچێنێ قوڵپ ، ئیتر ئۆدمای چن ڕیزێ تەر بێ کە گولانە تەرێ بێن ( دوە قەرانی) تا یاوێ سەرو پڕچکە تلاینەکەی ،زەڕە چەرمەکە  زیو بیەن.. بازێ کەسیچ دۆلەمەند بێ لیرەی ئاڵتونشا کەردەن فێسەکێرە چەنی زەڕی چەرمەی.

فێسەکێ بە لاگیرێ و( چێر چەناکە) زەریفی ئاڵتون یان زیو چێرو چەناکەیرە ئێ و زەریف چەسپەو سەرەی بێ..

کڵاو زەڕە ئەوسا  جە  هەورامان هەر کەس ژەنیش ئاردێ ئەشیا  کلاوزەڕەش کەردێ پەی ژەنەکێش پێسە مارەیی،بەلام ئیسا ئی مۆدە نەمەنەن ،کلاوزەڕەیج  پێسە کەلتوری کۆن و فۆلکلۆریش سەرئامان..کاڵازەڕەو هەورامان جیا بیێنە چەنی ناوچەکا تەری  کوردسانی، چون یاگا تەری زەڕی چەرمە و پڕچکەش پۆ نەبیەن ،، بەچیوی تەر ڕازیانۆ.

ئی رەسمەم دی و پڕچکەش پۆ بێ پۆکەی حەزم کەرد ئی چن دێرەیە بنویسو،،هەرکەسیچ فرەتەر مزانۆ جە بارەو پڕچکەی یان کڵاو زەڕێ سوپاسش کەرو کە زیادش کەرۆ.

 واتێ وەڵێنا  هەنە  ماچۆ(  کەرگی و پڕچکە؟) یانی پڕچکە تەنیا جە سەرو مێقنی زەریف و عالی مێ،نەک سەرەو کەرگێ کە باریک و گولانەن....یان گر هەرمانو کارێ جەکرکەسی نمێ... یان گرکەس  وەش پەنە کەوتە نیا  وەختێ پۆشاکێ تازە پۆشۆ

د.ناجح  گوڵپی 27/1/2016