واتچنسازی پی زوانیە چاپ و پەخش مەبوٙنوە

 واتچنسازی پی زوانیە چاپ و پەخش مەبوٙنوە

ششەم بەرویرو ناجح گوڵپی جە ویارو زوانئەشناساینە، پی زوانیە چاپ و پەخش مەکیروٙوە. تازەتەرین بەرویر جە ویارو واتچنسازین (ڕیٛسە، ڕیٛسمان). ئی کتیٛبە 346 پەلیٛن بە قەبارەی 24*17 وەزیری.

کتیٛبەکە یەریٛ لیٛژیٛن، لیٛژەی یوەم باسو واتچنسازی و گرامەی، هەرمانیٛ واتچنی و گرامەری چیٛشیٛنیٛ جە زوانەنە؟ قاعدیٛ زوانی، زوان چەنی هەرمانە مەکەروٙ، پەیوەندی واتچنسازی چەنو ڕازوانی، واتچنی دروس و نادروس کامەن، ساختاری لیٛڵ چیٛشەن؟ شیتاڵو واتچنی، ڕزو پەساکاو واتچنی، نمانو درەختو واتچنی چیٛشەن؟ ڕازوانو بەرهەمئاوردەی و ئەوەفاڕایGenerative $ Transformation Grammar،  ڕازوانی گردینی، چوٙمسکی و زوان،  بڕێو باسیٛ و بابەتیٛ تەریٛ گرنگیٛ.

لیٛژەی دووەم باسو دەسەواتیٛ بەگردو جوٙرەکاشەوە کریان، قانونو سازنای دەسەواتیٛ، واتیٛ و کوٙنستیتونتی Constituent. سەلەمنای کە واتچن جە دەسەواتیٛ بکەری و کەردەوەی سازیان، هەرپاسە جە دروسنەی-کونستیتونتی سازیان نەک واتیٛ. ئەگەر گەرەکت بوٙ زوانێو بزانی و پەنەش بنویسی مەشوٙ جە ساختارو دەسەواتیٛ بەڵەد ببینە بە دروسی، یانی بزانی دەسەواتیٛو نامیٛ و یاوەرنامیٛ پیٛوەرە هوٙرشا ببەسینە، ئینجا متاوی واتچنی دروس بنویسینە.

لیٛژەی یەرەم، باسو ڕیٛسە، ڕیٛسمان و واتچنی مەکەروٙ. پەلیٛ واتچنسازی، پەساکیٛیٛو واتچنسازی (بەشەکیٛو دوای)، جوٙرەکیٛو واتچنی (واتچنی سادە، ناسادە-ئامیٛتە و ئاڵوٙز). ئامرازیٛ بەستەی و یاونای، واتچنو (هەواڵی، پەرسیٛ، سەرسامی، شەرتیٛ، فەرمانیٛ)، پەسا سەرەکیەکیٛ و ناسەرەکیەکیٛ واتچنی، بکەر و جوٙرەکیٛش، وەرکارو جوٙرەکیٛش، نیهاد و گوزارە، پەیوەندیە ڕازوانیەکیٛ، تیورەو بەستەی، تیورەو ئیکس-باڕی، نمان و قاعیٛدیٛ و ئێکسباڕی... چندە باسیٛ و بابەتیٛ تەریٛ.

شیاو واتەین، واتچنسازی و ڕازوان دویٛ پاییٛ گرنگی زوانینیٛ پیٛوەرە بەسیێنیٛ، چومسکی واتەن واتچسازی پسەن دڵو لاشەی، پەوکای زانای و انای واتچسازی و ڕازوانی پسەن دڵو زوانی، دڵ یانی ژیوای، کە دڵ نەبی یانی ژیوای نیەن. واتچنسازی و ڕازوان  یانی ئاستەیەو زوانی بە زیندەیی یانی قانونون نویستەی، ئەگەر ئی دووە چیٛوا بزانی یانی مزانی بە قانونی، ئەکادیمی، زانشتی و ڕاسو دروس و پەسینا زوانکەو ویٛت بنویسی و بپاریٛزنیش و نەمروٙ.

ناجح گوڵپی 4/11/2024