گەشتەی، گیٛڵای، گیٛڵنای، گیٛڵیای
گەشتەی: گەشتەی، چەمەی بنەڕەت ویەردەن، فرەکەم بەکار مەیوٙنە، کوٙریانەوە، چەمەو گەشتەی پەی نەویەردەی مەفاڕیوٙ پەی گیٛڵای، گیٛڵنای، گیٛڵیای، دلیٛو شعرەو شاعرەکانو ئەدەبیاتو گورانینە نمونەو گەشتەی فرەن، بفەرماودیٛ نمونێ گەشتەی جە شیٛعرەکانو وەلی دیٛوانەینە:
ئەریٛ هەی شیرین قامەت زەر ستون رەژیدەی قودرەت کارساز بیٛ چون
منت کەردەن(قەیس) سەرگەشتەی مەفتون ڕەنگ زەرد و زایف بەتەر جە مەجنون
مەگیٛڵون هەردان وە جەستەی پڕ وەی سزای تۊ تا چەند سەبر من تاکەی
گەشت قەڎو چەمەین، گەشتە یاوەرنامیٛ بکەرینە، گەشت نامیٛنە، وەڵتەریچ زاناما کە قەدو بڕێ چەمەکا مەبوٙنە نامیٛ. گەشت و گیٛڵ، گەشتیار.
گەشتی مەگیٛڵوٙ، گەشتی مەگیٛڵیٛ، گەشتی مەگیٛڵیٛنیٛ. گەشتو گیٛڵ جوٙتواتیٛنە فرەفرە زوانو ئیٛمەنە بەکار مەیوٙنە. واتیٛ دوەمە هەمان ماناو واتیٛ یوەمیٛ مەدوٙنە بەشیٛوە تاکید واچیێنە.
گیٛڵای: گیٛڵنای، گیٛڵیای، گیٛڵای چەمەی بنەڕەت نەویەردەن، گیٛڵنای چەمەی ویەرەن، گیٛڵیای، چەمەی نادیارەن. ئەوەگیٛڵای، گیٛڵایۆ، گیٛڵایوە، پوٙرەگیٛڵای، گیٛڵای پوٙرە، پۆگیٛڵای، وەنەگیٛڵای، هورگیٛڵنای، هورگیٛڵایۆ، هورئەوەگیٛڵای، پەنەگیٛڵای، پەنەگیٛڵنای، گیٛڵایپوٙنە، چەنەگیٛڵای، ئەرەگیٛڵ "ئەراگیٛڵ" یانی عاشق، گیٛڵایرە: گیٛڵێنەرە "نەوەژنەکیٛ گیٛڵارە" یانی تورمش قبوڵ کەردەن. گیٛڵای گیٛڵو، گیٛڵای گیٛڵیٛنیٛ، گیٛڵای گیٛڵابیەنیٛ، گیٛڵای مەگیٛلوٙ. گیٛڵ ڕیٛخەو چەمەی، ماچوٙ گیٛڵم کەردۆ، یانی تاق گیٛڵ ئەرکو نامیٛ مەوینوٙ. گیٛڵە نامیٛ چەمەینە، دەرگیٛڵ بە کەسێو ماچا کە بەراو بەرە بکەروٙن.
گەڕان، گردان هام ماناو ئی چەمەینیٛ، گەشت و گیٛڵ هەردوی واتیٛ هەورامینی. متاومیٛ ڕیٛخە چەنی دماگیری گیٛڵ+یار: گیٛڵیار نامیٛ بکەری بسازنمیٛ، گەشتیار و گیٛڵیار یەک ماناشا هەنە. بڕێ جاریٛ ماناو چەمە ئەرەتاشیاکا فرە مەواڕیوٙنە، پەی نمونەی هوٙرگیٛڵایەو یانی لاکەردەیۆ پەی چیٛوێ، هوٙرگیٛڵنای ماناو تەرجمەی و ئەوەفاڕای ماناو واتاو زوانی مەڎوٙنە.
ناجح گوڵپی. 29/5/2024
سەرچەمە: ڕازوانو هەورامی بەرگی دووەم. چەمە.
