زوان ترپەو دڵو فەرهەنگینLanguage is the heart beat of culture
زوان سەرەکیتەرین دەسینەن پەی سازنای
فەرهەنگی، پەسان پەی ئەوەفاڕتەی نەریت و باوەڕو عادەتەکا، زوان هەرمانیوەی
کۆمەلایتیەی گرنگە مەپۉڕنۉ، هەستت بە قوەت مەکەرۉ کە فەخر بکەری بە ئەشناسنامە
ویٛتەوە. زوان نونگەن پەی پاراستەی و ئاستەیۉ میراتی فەرهەنگی، ئەشناسەسازی، پاراستەی
نەریتەکا میانو وەچەکانە. زوان فرە زیاتەرەن جە پەیوەندی دوای، گەنجینێون جە
ویەردەی، بەها و جەهانوینیە هامبەشەکیٛنیٛ کە فیسپەگاکاو مەردمی مەبینا هەنگەریوە.
کاتێو زوانێو کاڵ مەبۉوە یام دلیٛنە مشۉ، ئینیٛ گرد چەنیش دلیٛنە مشا. یانی تا
ترپەو دڵی بە ڕیٛکو پیٛکی بدۉوەنە، لاشە تەندروستەن، تا زوانیچ بە ریٛکوپیٛکی
هەرمانە بکەرۉ فەرهەنگیچ بەڕیٛکوپیٛکی پەرەمسانۉ.
گەشەو زوانی هەمسانەن چەنی گەشەو
فەرهەنگی. شانبەشانو هەنترینی ملا وەڵیٛوە، گەشەمەکەرانیٛ، پەرەمەسانانیٛ، بەهەمان
شیٛوەیچ، پیٛوەرە کاڵیٛ مەباوە و مەمرانیٛ. هەرپسەو دڵو ئانزانی، ئەگەر دڵ
هەرمانەش کەردە لاشەو ئانزانی بە جوانی هەرمانە مەکەرۉ، تەندروستەن، ئەگەر دڵیچ
سست بی و هەرمانەش لەنگەبیە، فەرهەنگیچ بەهەمان شیٛوە کاڵ و کەم ڕەنگ مەبۉنە. بە
مەردەی دڵی لاشەیچ مەمرۉ، پەوکای بە دماکەوتەی زوانی فەرهەنگیچ دمامەگنۉ، چەنو
مەردەی زوانی فەرهەنگیچ مەمرۉ، ئاگردە بەرهەمیٛ بە دریٛژایی تاریخی سازنێنیٛش،
چەنی فەرهەنگەکەی دلیٛنە مەشانیٛ و مەکۉریانیٛوە. پاسە بۉ بەبیٛ زوانی فەرهەنگ
نیەن، گردما مزانمیٛ ئاژەڵیٛ زوانشا نیەن، فەرهەنگیچشا نیەن. دماجار زوان فەرهەنگ
مەسازنۉ، مەپاریٛزنۉش و مەواڕۉشەوە میانو وەچەکانە و مەیاونۆش بە گردو فەرهەنگەکاو
جەهانی.
ئارۆ ئەرکو سەرو شانەیمانە کە
زوانەکەیما بپاریٛزنمیٛ و گەشەش پەنە بدەیمیٛ پەی ئەوەژوژنای فەرهەنگو هەورامانی.
ویەردەنە زوانەکەما (گۉران) بەکاربیەن، فەرهەنگێوی دوڵەمەندش سازنان، تا ئیسەیچ
یاگیٛو شانازیمانەن، پەیوازەن ئی میراتیە نە وڵاونمیٛ سەرەمڕیٛ بیمیٛ سەرش.
مەبارەکەن ڕۉی جەهانی زوانو ئەدێ
ڕۉو زوانو ئەدێ مەبارەک بۉ جە
هامزوانەکام
د. ناجح گوڵپی 21/2/2026
