هەورامان نێت؛ پایگەیوە پەی خزمەتو
زوان و فەرهەنگو هەورامانی
ڕوٙ 24/2/2020
پایگەی ئینترنێتی هەورامانی(وەڵاوگاو هەورامانی) پا مەنیوٙنە ساڵەی یەرەمەو
تەمەنیش. ئەچی دوەساڵی ویەردەنە وەڵاوگاو هەورامانی بەبیٛ جیاوازی پەیلوای، ویری، تەقەلاش دێنە، فرەو بابەتە هەورامیەکانش
وەڵاویٛ کەردیٛنیٛوە، تائیسەیچ گوشش نەدان بە جوٙرو نویستەی یام ڕانویسو
بابەتەکان، هەمیشە بەگردو لەهجەکانو زوانو هەورامی بابەتیٛش وەڵاو کەردیٛنیٛوە،
تەنیا ئانەش وەرەچەم گیٛرتەن کە هەورامی نویستەی خزمەتەن بە فەرهەنگی و
زوانەکەیمان جە ئیسەتیٛنە، ئاروٙنە جاریٛ نویستەی گرنگەن بەهەر جوٙریٛ بوٙنە.
دماجار ئەگەر فرەت نویست ئەکید ویٛت یاوی پانەی و قەناعەت مەکەرینە کە ئەوەجەمان
هەن بە فاڕای نویستەی جە سنوریٛوە دیاریکریانە بلینە پەی سنوریٛ فراوانی، یانی
لەهجەو دەگای پڕنی و بلی پەی زوانی یوگیری کە ببوٙنە بە زوانو گردو هەورامانی، بە
هەمیٛدو ئانەی کە ڕانویسی هەورامی یوگیر وردەوردەی بنپەرگ بنیوٙنەو بگنوٙنە سەرو
ڕای راسیٛ ویٛش.
هەورامان. نێت
پەلیانیٛوی زانستی و فەرهەنگین، هەرگیز سیاسی نیەن، ویٛش دوورداروٙ جە پەتاو
سیاسەتی، گرنگی مەڎوٙنە بە ویارەکانو زوانی، زانایی و مەعریفەی، هونەر و ئەدەبو
هەورامانی، تاڕیٛخەو هەورامانی، ئەشناسنای هەورامانی، باسیٛ گردینییٛ و چەنی
هەواڵیٛ تایبیٛ بە هەرمان و کار و چالاکی هونەری وئەدەبی جە هەوراماننە، یانی زیاتەرین
ڕوٙشنای مەوزوٙنە سەرو زوان و فەرهەنگو هەورامانی و هەربابەتیٛو کە خزمەتو
فەرهەنگو زوانەکەیمان بکەروٙن ئەگەر بەزوانی تەریچ بوٙنە وەڵاو مەکریوٙنەوە.
هەورامان نێت هەردەم تەقەلا مەڎوٙنە پەی زیندە ئاستەی واتە کونەکانو زوانو
هەورامی، واخوا ئاردەیشانوە دلیٛ و نویستەیشان، بەهەمان هازی تەقەلا مەڎوٙنە کە واتیٛ تازیٛ هەورامیانیٛ باروٙنە
سەرو بنەڕەتو یاساو(واتیٛسازی/ مۆرفۆلۆجی)، چونکەتەی زوانەکەمان هەتا واچی
دوڵەمەندەن تەنیا کەمیٛو مەژگت وزەهەرمانە فرە بەئاسانی هەزاران واتیٛ تازیٛ و
کوٙنیٛ مارینە، زوانو هەورامی/ گورانی وەڵتەر یانەوەی زوانێوە دوڵەمەندی بیەن با هەمدیس
کەلک چا دوڵەمەندیە هوٙربگیٛرمیٛ و زوانێوە سەردەمیانەو ئاروٙیانە مەرزنمیٛرە
بەهامکاری دوسان و زانایانو هەورامانی.
هەورامان نێت
یاگیٛوەن پەی ئەوەژیونای فەرهەنگ و زوانو هەورامی، نەک یاگیٛو کاسپی و بازرگانی
کەردەی و هەرزان ورەشی زوان و فەرهەنگی،
پەوکای سەرمڕەن بە زانستی و هەورامیانە نویستەی. هەورامان نێت زوانحاڵو گردو
هەورامانین، یانەو نویساران و فەرهەنگ دوسان و شاعیٛرانو هەورامانین، نەک تەنیا
هەورامان گیٛرە هنو گردو گوٙران زوانەکان(شەبەک، باجەلان، زەنگنە، یارسان،
هەورامان، کەنوڵە...هتد). وەشحاڵیٛ مەبیمیٛ بە کیاستەی بابەتەکانتان جە گرد لایێوە.
چی ویارنە
فرێوە جە قەڵەم بەدەسانو هەورامانی هامکاریٛما بینیٛ و بابەتەکیٛشان ئەچیٛگەنە
وەڵاویٛ بینیٛوە. پیروٙزەن ئەنەگیسنای تەمەنی یەرەساڵەو هەورامان نێتی(وەڵاوگاو
هەورامانی) خزمەتکارو زوان و فەرهەنگو هەورامانی.
د. ناجح گوڵپی
یانەوی و ڕاوەبەرو هەورامان نێتی
24/2/2020 دوەشەممە
